SÁBADO 28 de NOVEMBRO do 2020

O programa deste sábado é unha gravación especial que confeccionamos para todos os nosos oíntes e seguidores, por mor da celebración da entrega dos Premios aos gañadores do "XXXIV Certame de Poesía Rosalía de Castro". Na sede da Entidade realizouse unha sesión de Instagran,  dunha hora de duración, para facer públicos os nomes dos gañadores do Certame de Poesía, e aproveitamos para amosar algunhas das numerosas felicitacións que enviaron unha grande cantidade de amigos, socios, personalidades políticas, cantautores, escritores, poetas... moitísimas persoas. Non puidemos visualizalos todos, pero prometemos facer unha recopilación ou video documental para arquivalo na Biblioteca da Asociación. 

Despois de escoitar unha primeira peza musical poñémonos en contacto co noso correspondente nas Rías Baixas, concretamente Combarro, Xulio Simón Rúa, que ten preparada unha lectura escollida moi interesante. Despedímolo con música e continuamos a gravación.

Conectamos novamente con Galicia, concretamente co noso amigo e esporádico colaborador Henrique Fernández-Mon Sánchez, Kique para os amigos. Queremos que nos informe das súas andanzas e inquedanzas nos primeiros anos da creación e posta en marcha dese Premio de Poesía "Rosalía de Castro", e esta é a súa exposición. Escoitade o seu parlamento

.

E finalizamos este programa especial dun sábado tamén especial, ofrecéndolles algunhas pezas musicais que son novidade na nosa emisión, posto que son primicia para todos nosoutros, xa que pertencen a sendos CDs que nos enviaron para celebrar os 40 anos da creación e inauguración da Entidade.

O vindeiro programa prometemos estar en directo e ofrecerlles algo máis interesante e novidoso. Tentaremos que pasen dúas horiñas entretidas e cheas de boa compaña. 

¡Cúidense moito e Sexan felices!

SÁBADO 21 de NOVEMBRO do 2020

Comezamos dándolles a ben-vinda e saudando ao noso primeiro convidado: Xurxo Souto. Poñemos un bocadiño de música e saudamos tamén ao noso compañeiro nas locucións, Armando Fernández. Dámoslle os nosos parabens por esa nova publicación que acaba de saír do prelo: Recordos poderosos - Pangalaica. Editado por Galaxia. Coméntanos algunha das historias recopiladas por Xurxo e que recrea con moito acerto nesa publicación, chea de engado. Desexámoslle moitos éxitos e prometémonos voltar a conectar con el para seguir recibindo novidades e actuacións interesantes. ¡Moitas grazas Xurxo!

A segunda conversa-entrevista é con GISELA RODRÍGUEZ, a nosa mantedora e coordinadora do Grupo de Teatro "Anduriña". Non puidemos reunirnos, como faciamos sempre despois de que tiveramos unha actuación, para comentarmos e intercambiar impresións sobre a última interpretación, por mor do cornavirus... Lamentamos a interrupción, pero por outra banda celebramos que aínda que fora a última actividade da nosa Entidade, non houbo que lamentar demasiadas incidencias. Agardamos para vindeiras datas, cando esta pandemia remita, poder seguir ensaiando e interpretando as nosas obras. Xa ten algunha obra de teatro seleccionada para cando poidamos reunirnos, e seguro que pronto poderemos celebralo. Agradecémoslle a súa amable atención de hoxe.

Seguimos adiante e conectamos coa nosa correspondente nos "Ancares Lugueses" dona Fernanda Follana Neira, que ten preparada a súa crónica semanal. Nesta ocasión fálanos da súa experiencia cos lobos na contorna de Becerreá, tamén nos comenta cómo os captou nunha cámara... e para finalizar recoméndanos visitar a páxina de Internet, concretamente Facebook: "Piornedo Anda", que ten propostas de Rutas e Sendeirimo moi interesantes. Despedímonos ate a vindeira semana e escoitamos outro bocadiño de música.

Namentres non conectamos co seguinte convidado, comentamos as ausencias dos nosos correspondentes na Baixa Limia, Xosé Lamela e nas Rías Baixas, Xulio Simón, que por motivos alleos e obrigas persoais, non puideron participar hoxe no programa. Novamente algo de música e voltamos a Galicia.

Finalizamos, como ven sendo habitual nestas semanas de atrás, co noso Poeta da Mariña Luguesa, PACO RIVAS. Con quen falamos un chisco, dalgunhas cousas intrascendentes, pero tamén solicitámoslle que nos dedique algunha das súas creacións poéticas, e moi amablemente nos agasalla coa súa recitación. Agradecémoslle-lo e  aproveitamos para despedírmonos del e de tódolos nosos oíntes e seguidores: ¡Até o vindeiro programa!

SÁBADO 14 de NOVEMBRO do 2020

Comenzamos, unha semana máis, outra emisión deste noso programa "Semprengalicia" de dúas horas de Radio en galego. Teremos conexión con Galicia, cos nosos correspondentes, tamén algunha entrevista, novidades e música galega. Despois das salutacións de inicio dámoslle a ben-vinda ao noso Presidente da A.C.G.Rosalía de Castro, Oliver Fernández, que nos acompaña esta tarde. Tamén saudamos e recibimos ao noso correspondente na Baixa Limia, Xosé Lamela Bautista. Comentamos varias cousas relacionadas coa actualidade que estamos a afrontar e tamén nos informa o noso Presidente da próxima celebración da entrega dos Premios do "XXXIV Certame de Poesía Rosalía de Castro" previsto para o día 28 deste mes de novembro, se as circunstancias nolo permiten intentarase realizar dende a Entidade.

Despois conectamos con JAVIER, responsable dunha Empresa que se dedica a enviar e distribuir productos de proximidade, do Rural, con prezos moi asequibles. Trátase de "Retorno al Pueblo", que podedes atopar moi facilmente en Internet. Coméntanos cómo se formou esta iniciativa tan interesante e curiosa, que está a ter moitas demandas e sigue incorporando diversos artículos que poden ser interesantes para os futuros clientes, non só pola calidade senón tamén polo artesanal e naturalidade dos mesmos. Fai público o anuncio de que todos aqueles oíntes e seguidores que fagan unha demanda co nome do noso programa terán unha deducción de 4€uros na súa factura. Agradecémoslle a súa participación.

Continuamos a segunda hora conectando con Xulio Simón, o noso correspondente nas Rías Baixas, concretamente en Combarro, a quen felicitamos pola posta en marcha da súa páxina: Xulipedia.com. Comenta algunhas cousas sobre os libros, e moi especialmente o de "Contos populares da provincia de Lugo", e lembrándose dos que lle contaba seu avó, explícanos un deles, onde aparecen como protagonistas un cura e o sacristán.

Interrumpimos a crónica de Xulio para darlle a ben-vida á nosa correspondente nos Ancares, Fernanda Follana Neira, que tamén ten preparada unha crónica moi interesante propoñéndonos facer algunhas rutas por aquelas contornas, que nesta tempada de outono son especiais pola diversidade paisaxística e o colorido espectacular. Despídese ate a vindeira semana.

Escoitamos outro bocadiño de música e saudamos ao noso Poeta da Mariña, Paco Rivas. Conversamos entre todos con el. E despídese coa lectura dunha creación poética moi especial, que ten moito que ver coa situación social qu estamos a sofrir nestes momentos. Agradecémoslle a súa sempre estimada colaboración, e despedímonos ate a vindeira semana.

Que teñades unha feliz semana!!!

SÁBADO 7 de NOVEMBRO do 2020

Ofrecémosvos un novo programa de Radio en galego conectando coa Baixa Limia para que o noso correspondente Xosé Lamela Bautista nos presente ao seu convidado de hoxe: AMABLE, responsable da Empresa ECOMEL, que ven de recibir un Premio de grande prestixio: O Panal de OURO colleita 2019. A súa explotación, ou mellor dito a extracción da Mel Ecolóxica que el comercializa, ten a súa orixe nos Montes da Reserva da Biosfera do Parque Natural do Xurés. Felicitámolo e conversamos con el para que nos informe.

A segunda comunicación é coa Poeta, escritora e investigadora ALBA CID, a quen se lle concedeu o Premio Nacional de Poesía Joven "MIGUEL HERNÁNDEZ". Os nosos parabens. Despois de manter unha pequena conversa-entrevista, despedímola cun bocadiño de música.

Conectamos novamente con Galicia, concretamente co noso correspondente nas Rías Baixas, Xulio Simón Rúa, que sempre ten preparada unha participación moi ilustrativa.

Seguimos escoitando outro bocadiño de música, neste caso do Grupo CALDO, que foron seleccionados para seren finalistas do Concurso Fran Pérez, "Narf". E falamos agora con Fernanda Follana Neira, a nosa correspondente nos Ancares.

 

E finalizamos cunha cativa intervención do noso Poeta da Mariña Luguesa, Paco Rivas. Prometemos chamalo con máis tempo.

Despedímonos ate o vindeiro sábado á mesma hora. ¡Disfruten da semana! e ¡Cóidense moito!

SÁBADO 31 de OUTUBRO do 2020

Último programa do mes de outubro, con algunha que outra novidade e exclusiva para tódolos nosos oíntes e seguidores. Coma sempre, música de sintonía. Nos controis técnicos Kiko Belinchón. Nas locucións Armando Fernández e mais un servidor. Comezamos dándolles a ben-vinda e disculpándonos pola posible audición un tanto alterada, por mor desta nova opción que tivemos que adoptar por mor da pandemia que estamos a sofrir. Desexamos que a audición non se vexa demasiado alterada. Escoitamos un bocadiño de música e saudamos ao primeiro convidado de hoxe, que nos recibe recitando un poema que se recolle no seu último libro que acaba de publicar Galaxia: Federico García Lorca. "Poeta en Nova York". Suso Díaz. Agradecémoslle a súa amable atención. Preséntanolo o noso correspondente na Baixa Limia, Xosé Lamela Bautista, e conversamos con Suso Díaz, sobre diversos aspectos e antes de despedirse aínda nos recita uns "haikus" para celebrar o día de Ricardo Carvalho Calero.

 

Escoitamos un bocadiño de música e saudamos a Juan Pedro Sánchez, Presidente de ASOBECAT, a quen lle agradecemos a súa intervención para poder disfrutar dalgúns agasallos, que recibiremos por parte desa Asociación de Bercianos, para celebrar os "40 anos da A.C.G.Rosalía de Castro" e o "40 Aniversario de Radio Sant Boi". Temos pendiente poder saudar e entrevistar a un convidado do Bierzo.

Comezamos a segunda hora conectando novamente con Galicia para saudar e agradecerlle a súa participación a OLGA NOVO, Profesora, Poeta, Escritora, Pintora e Ensaista, que ven de recibir o Premio Nacional de Poesía 2020, que ela mesmo nos puntualiza como Premio Estatal de Poesía. Felicitámola e parabenizámola por ter acadado tan prestixioso Premio. Entrevistámola-Conversamos con ela e fálanos do traballo polo que foi premiada, concretamente Feliz Idade. Queremos saber en qué está a traballar e coméntanos algo sobre unha recopilación de escritos na Revista Luzes, dirixida por Manuel Rivas e Xosé Manuel Pereiro. Agradecémoslle a súa participación na nosa humilde radio e prometemos voltar a falar con ela  noutra ocasión, desexando que siga a colleitar moitos éxitos.

A seguinte intervención-conexión é con don PACO SOTO, Presidente da Sociedad Cooperativa Agrícola GISTREDO. Preséntanolo o noso convidado Juan Pedro. Falamos dese producto que eles recollen e distribúen: As Castañas de Parede, con Denominación de Orixe, producto de calidade, da localidade de Noceda del Bierzo. Infórmanos que este ano posiblemente a recolleita non alcance a de outros anos, pero están moi satisfeitos de cómo vai a comercialización. Tamén nos informa da posible adquisición dunha máquina para poder producir fariña de castaña e eliminar intermediarios e ofrecer así un producto máis. Agradecémoslle a súa aportación e colaboración de hoxe.

Conectamos co noso Poeta da Mariña Luguesa: Paco Rivas. Infórmanos de que acaban de facer un acto en Italia moi interesante, relacionado coa súa creatividade: "II Bienale Internazionale di Pescara". na vindeira semana poderemos falar con máis detenemento deste evento e doutras cousas. Despedímonos ate o vindeiro sábado á mesma hora. 

SÁBADO 24 de OUTUBRO do 2020

Unha semana máis con todos vosoutros, ofrecéndovos este programiña de dúas horas de Radio en galego. Despois dos saúdos iniciais, conectamos coa Baixa Limia, para que o noso correspondente Xosé Lamela Bautista, nos presente ao seu convidado de hoxe: Benito Antúnez, máis coñecido por "Valente", apicultor da zona da Serra do Xurés. Mantemos unha pequena conversa-entrevista sobre ese tema tan interesante, como é a extracción do MEL.

Seguimos co programa conectando novamente con Galicia, concretamente con "Martín Maez" cantautor galego, de Pontevedra, que ven de enviarnos varios CDs -o seu último traballo: "Hábitat"- Un agasallo que compartiremos cos nosos oíntes e seguidores, para celebrar os 40 anos da nosa Asociación C.G.Rosalía de Castro e o "40 Aniversario de Radio Sant Boi". Agradecémoslle a súa colaboración de hoxe e desexámoslle que teña moitos éxitos.

Panadería DISU

Escoitamos outro bocado de música e chamamos a Digna, da Panadería DISU, de Navia de Suarna. Saudámola, dámoslle as grazas polos agasallos que recibimos para celebrar os dous 40 aniversarios da Radio e da A.C.G.Rosalía de Castro, que estamos celebrando. Recibimos pan, bizcoitos, madalenas, larpeira, roscón de noces, tarta de Navia, Empanada de ballao con pasas, empanada mixta de atum, brazo de xitano... Unha fartura de produtos. Comentamos con ela o traballo que ten que realizar para atender aos clientes da zona, repartindo polos pobos. Noutra orden de cousas infórmanos de que os que desexen adquirir os seus productos poden dirixirse á súa páxina e mercar "online" calquera produto. Tamén poden recibirse directamente no domicilio do cliente. Hai dúas tendas físicas en Barcelona, ás que envía semanalmente pan de centeo (do país) principalmente, e outros produtos. 

Conectamos co noso correspondente nas Rías Baixas, Xulio Simón Rúa, que nos ten preparada a súa crónica cultural semanal, sempre chea de informacións diversas.

Falamos con Fernanda Follana Neira, a nosa correspondente nos Ancares Lugueses, que tamén ten preparada a súa intervención e crónica semanal. Agradecémoslle a súa colaboración.

Chamamos a Francisco Xabier Rodríguez, Presidente de SAUDADE, que nos informa da próxima celebración do Magosto 2020, que este ano ten un protocolo especial, debido á pandemia que estamos a sofrir. Os socios e simpatizantes poderán recoller as castañas recén asadas o vindeiro día 7 de novembro entre as 4h e as 8h da tarde, na zona da terraza da Entidade. Recomendan que nos se aglomeren na entrada para evitar demasiada agrupación e gardar o distanciamente requerido. Tamén se pode mercar a Lotería de Nadal da Entidade, Nº 76184. Con respecto ás demais actividades, están reducidas e mantendo as normas e prevencións que debemos cumplir, por mor do coronavirus.

E antes de despedirnos dos nosos oíntes e seguidores, conversamos co Presidente de ASOBECAT, don Juan Pedro Sánchez, que tamén nos informa das actividades que puideron realizar: neste verán a entrega dos Arlequíns á Cooperativa Agrícola Gistredo Castañas de Parede e ao Cura de Cacabelos, Celebración dunha Eucaristía á "Virgen de la Encina" Patrona do Bierzo, suspensión do Magosto do 2020 e preparación do Festival do Botillo 2021... Agradecémoslle que colabore con nosuotros e desexamos moitos éxitos nos seus proxectos. Despedímonos de tod@s vosutr@s ate a vindeira semana á mesma hora. ¡Que pasen unha feliz semana!

SÁBADO 17 de Outubro do 2020

Outro programiña máis con todos vosoutros. Dámoslle a ben-vinda e grazas ao noso técnico Kiko Belinchón estamos conectados co noso compañeiro Armando Fernández e o noso correspondente na Baixa Limia Xosé Lamela. Despois de escoitar un bocadiño de música Xosé presentanos ao seu convidado de hoxe: LINO PERDIZ, de PLABALI, que nos pon ao corrente de moitas e interesantes novidades que están relacionadas con aquelas terras raianas e moi en especial das actuacións que están a realizar para que se leven adiante algunhas das reivindicacións que teñen aínda pendentes de realización. Agradecémoslle a súa amable atención e voltamos a escoitar outra peza musical. 

A seguinte comunicación é coa nosa correspondente nos Ancares Lugueses, dona Fernanda Follana Neira, que nos ten preparada unha crónica de novidades interesantes, e moi concretamente algo relacionado co Rural Galego. Destaca o grande labor que está a facer un ex-alumno do colexio en Navia de Suarna, Ismael Álvarez, que recolle nun seu traballo que publica na súa páxina web, con nada menos que 70 xogos tradicionais daquela zona. Tamén nos fala de Ainoa Fernández, unha alumna aventaxada que ben de recibir un agasallo da Deputación de Lugo por poñer en valor o Rural e que fixo un video cun poema de Andrea Valle. Outra persoa que destaca é David de Poso, un dos artistas que participou como actor na película tan premiada "O que arde", e que a pesar da súa xuventude ben de facerse cargo da explotación gandeira dos seus pais, formando parte da cooperativa "A Carqueixa, unha opción moi noble que lle honra porque ademais de ter unha formación contrastada (grado superior forestal titulado) paraticipa do seu traballo no Rural galego. A outra nominación é a de Xiao Yáñez, outro alumno aventaxado daquela zona que ben de acadar o Fin de Grado na especialidade de Piano con Premio e está a estudar segundo de Bacharelato en Becerreá. Os nosos parabens para todos eles!!! E despedímonos de Fernanda escoitando outra peciña musical para irmos adubiando estas nosas conversas.

Precisamente a seguinte comunicación é con Kike Fernández-Mon Sánchez, avó de Xiao Yáñez, de quen falabamos antes con Fernanda. Dámoslle a ben-vinda e mantemos unha conversa, entre os catro, comentado cousas de certo interese para tódolos nosos oíntes e seguidores. Para non aburrir á audiencia propoñemos escoitar unha peza musical do Grupo Malvela, que se titula "Trubisqueira".

E finalizamos despedíndonos de todos vosoutros desexando que pasendes unha feliz semana e que volvades a sintonizarnos o vindeiro sábado á mesma hora, que prometemos ofrecerlles outro programa máis, con moitas informacións, música e novidades relacionadas coa nosa cultura. Ata o vindeiro sábado.