SÁBADO 22 de MARZO do 2025

Outro sábado máis con todos vosoutros. Comezamos coa nosa sintonía, as salutacións e un bocadiño de música para recibir ao primeiro convidado desta semana: XOAN, da "Guía Furanchín". Agradecémoslle a súa participación e comentamos con el as dificultades que están a experimentar os Furanchos por mor das excesivas restricións que lle están a poñer algúns concellos. Un exemplo moi destacad é o do Concello de Redondela, que está a realizar algúns controis demasiado meticulosos que fan bastante difícil a tarefa de atención dos Furanchos daquela contorna. A continuidade e explotación destes establecementos familiares tan exclusivos e rurais, fan que as familias que as rexentan se vexan obrigados a cmprir unha normas que superan as esixencias que ten establecidas a Xunta de Galicia. Se non se fomenta e se potencian estes ancestrais locais familiares do rural, posiblemente se vexan obrigados a cerrar, o que representará unha mágoa e perda de postos de traballo moi importantes. Ogallá que non se chegue a ter que lamentar a perda desas explotacións de venta de viño excedente e tapas familiares, que tanto se aprezan. Desexámoslles moitos éxitos.

A segunda intervención é a do noso correspondente viaxeiro e documentalista XOAN ARCO DA VELLA, que nos relata algunhas curiosidades relacionadas co Santuario: A Virxe da Escravitude, en Padrón, cocnretamente na parroquia de Vila de Cruces. Relátanos algo da crenza e historia cáseque novelada, da creación e posta en valor desa fermosa e interesantísima localidade do Camiño Portugués de Santiago. Agradecémoslle a súa aportación, que nos axuda a coñecer, máis polo miúdo, algunhas curiosidades con detalles moi interesantes.

 

Falamos coa nosa correspondente nos Ancares Lugueses, FERNANDA FOLLANA NEIRA, que ten preparada unha intervención relacionada coa música, concretamente refírese a unha proba que estivo realizando Pablo Deiros, en Compostela. Precisemente compartimos a súa actuación mediante o Facebook noso, para máis audición e coñecemento dos nosos escoitantes e seguidores. Tamén nos comenta algunha que outra cousiña, pero déixanos coa intriga doutra posible información, que seguro no-la fará coñecer nunha vindeira ocasión.

 

Recibimos a Crónica do noso correspondente na Costa da Morte, OSCAR M. REY CALO, que sempre ten recollidas algunhas informacións moi interesantes daquela contorna. Tamén nos comenta as diferentes localidades que visitou esta semana para dar a coñecer ese traballo tan interesante da IA nas escolas. Volve a lembrarnos que se poden informar máis detidamente na páxina quepasanacosta.gal e que o programa re-emitirase o domingo en Radio Roncudo e Radio Fene.

Despedimos o programa anunciando a audición da 3ª parte da Entrevista a don Xesús Alonso Montero, que o noso correspondente nas Rías Baixas, concretamente dende Combarro, lle fixo en díaas anteriores. Os que estén interesados en escoitala completa terán que visitar os dous últimos programas que temos publicado no noso blog.

Aquí está a terceira parte da Entrevista que lle fixo XULIO SIMÓN RÚA, ao ilustre Profesor don XESUS ALONSO MONTERO. Agardamos que todo sexa do seu agrado.

Deixamos aquí o programa Completo-Enteiro.

SÁBADO 15 de MARZO do 2025

Unha semana máis con todos vosoutros. Dúas horas de Radio en Galego, para informar e dar a coñecer algunhas das actividades nos Centros Galegos, música, entrevistas e colaboracións dos nosos correspondentes. Comezamos coa nosa sintonía de sempre, as salutacións e un bocadiño de música para poñernos en contacto co primeiro convidado CARLOS LABRAÑA, a quen parabenizamos pola recente estrea do seu último traballo a cargo de Tanxarina Títeres: "A biblioteca Galáctica contra a IA Fantástica". Desexamos que siga colleitando moitos éxitos. Comentamos parte da súa traxectoria creativa e agradecémoslle a súa amable atención. Seguiremos en contacto.

Voltamos novamente a Galicia para recibir a crónica do noso correspondente na Costa da Morte, OSCAR M. REY CALO, que nos ten preparadas algunhas das noticias máis salientables daquela contorna, e que poden ser ampliadas na páxina quepasancosta.gal. Tamén lles lembramos que se poderá escoitar este programa na sintonía de Radio Roncudo a partir das dez da mañá, domingo.

   

A seguinte convidada é a nosa correspondente nos Ancares Lugueses, FERNANDA FOLLANA NEIRA, que tamén parabenizamos polos éxitos que está acadando, xunto co resto do equipo co que participa, na modalidade de orientación en bici. Fainos unha crónica reducida de varias novas interesantes daquela contorna lucense e desexámoslle que siga colleitando moitos éxitos.

Continuamos a emisión poñendonos en contacto con SILVIA CASTAÑEDA, Presidenta da Irmandade Galega de Rubí, que nos fai coñecedores de varias actividades que teñen previstas para próximasa datas, como son a matanza do porco o vindeiro domingo, a celebración do "VIII Concurso Literario de Relato Curto Manuel Rivas", a celebración das Letras Galegas, a súa Festa Galega en Rubí, a próxima actuación no Luar o día 9 de maio... etcétera. Tamén nos comenta a pasada celebración do "Concurso de Filloas" o mes de febreiro pasado. Desexamos que todo decorra con ben e prometémonos asistir a algún dos actos.

Seguimos escoitando outro bocadiño de música que flamos con PILAR ANSEDE, Presidenta do Centro Galego de Barcelona, a quen tamén parabenizamos polos moitos actos que veñen desenvolvendo, concretamente no día de hoxe está a celebrar un "Bingo-Musical Karaoke".  Teñen previsto facer a presentación do libro: "Mucho que decir y poco que contar" do escritor e periodista Javier Guillén, para o día 23 deste mesmo mes de marzo. Para o sábado anterior, día 22, tamén se poderá asistir á "IRIS-Session", na que poderán participar todos aqueles que se queiran sumar cos seus instrumentos. En días anteriores entregaron o Premio María Violeta-2025 a dona Elvira Veloso, un fermoso recoñecemento a unha grande muller. Propoñemos manter con ela e a propia presidenta un monográfico radiofónico para que nos explique unha morea de experiencias que nos podería comentar. Agradecémoslle a súa atención.

Recibimos a crónica do noso correspondente viaxeiro, fotógrafo e documentalista XOAN ARCO DA VELLA, que nesta ocasión fálanos da súa participación nunha xuntanza entroideira en Nogueira de Ramuín, parando a xantar en Luintra. Sempre é moi acaída a súa participación.

E para finalizar escoitamos a Segunda parte da Entrevista que o noso correspondente nas Rías Baixas, XULIO SIMÓN RÚA, que fixo a don XESÚS ALONSO MONTERO. Aproveitamos para despedirnos ate a vindeira semana á mesma hora.

Deixamos aquí o programa Completo-Enteiro:

SÁBADO 8 de MARZO do 2025

Un sábado máis con todos vosoutros, tentando ofrecervos dúas horas de Radio en Galego. Comezamos coa nosa sintonía de sempre, as salutacións oportunas e escoitamos un bocadiño de música. A continuación poñémonos en contacto con CONCHA, da Asociación Cultural TOXOS e XESTAS de Barcelona, que están a celebrar o "II Encontro Internacional da GAITA". Comezaron este evento tan importante pola mañá, con pasarúas e grande participación. Agora mesmo están a escoitar un Grupo Iraní, despois unha representación da A.C.G.Rosalía de Castro de Cornellà, antes da queimada a banda da propia Entidade e para finalizar o Concerto de SUSANA SEIVANE. Agradecémoslle a súa participación e información e desexamos que teñan moito éxito.

Despois de escoitar outro bocadiño de música poñémonos en contacto con CLARA FARIÑA, compoñente do Grupo musical "Pandereteiras de Verducido" a quen parabenizamos porque o vindeiro día 29 de marzo, na Sé da nosa Entidade, A.C.G.Rosalía de Castro, teremos a honra de contar coa súa presencia e participación, porque nos impartirá unha Conferencia co título: "A muller na música e na vida". Agradecémoslle a súa participación desinteresada e comentamos con ela algo da súa traxectoria musical. Desexámoslle moita sorte e moito éxito nesa celebración.

Continuamos a emisión poñéndonos en contacto co noso corresponsal XOAN ARCO DA VELLA, que sempre ten preparada unha intervención moi interesante. Nesta ocasión fálanos da súa asistencia ao Entroido de A Proba de Brollón, concretamente para disfrutar de "O OSO de Salcedo". Unha figura do Entroido, ancestral e, moi interesante que se celebra cada ano nesa localidade Ribeirana. A súa función consiste en emborrallar con cinsa, coa axuda dos seus criados, aos asistentes e celebrar que comeza a primavera. Tamén interpreta un certo ritual relacionado coa fertilidade. Agradecémoslle a súa información tan descritiva e desexámoslle unha feliz semana.

Damos a coñecer algunhas novidades. Primeiro comunicamos a celebración da Asemblea Ordinaria da nosa A.C.G.Rosalía de Castro de Cornellá que terá lugar na propia Sede mañá, domingo a partir das 19h. Continuamos informando de varias actividades previstas polo Centro Galego de Barcelona.

Recibimos a crónica do noso correspondente na Costa da Morte, OSCAR M. REY CALO, que sempre ten preparada unha seire de informacións e noticias relacionadas con aquela contorna. Unha escolla resumida do que acontece por alí, e que se pode ampliar na páxina quepasnacosta.gal, chea de novidades. Tamén recorda que este programa volve a emitirse mañá. domingo en Radio Roncudo a partir das dez da mañá. Agradecémoslle a súa participación semanal e desexámoslle unha feliz semana.

A última intervención será a do noso correspondente nas Rías Baixas, concretamente dende Combarro, XULIO SIMÓN RÚA, que nos envía unha entrevista que lle fixo ao eminente Profesor don XESÚS ALONSO MONTERO. Nosoutros escollimos tan só un bocadiño dese traballo tan interesante, porque non queremos que os escoitantes e seguidores cansen coa longa charla que mantiveron. Polo tanto esta semana ofrecémoslle unha primeira parte que prometemos continuala a vindeira semana con outra segunda parte. ¡Que teñan unha feliz semana!

Deixamos aquí o programa Completo-Enteiro.

SÁBADO 1 de MARZO do 2025

Este primeiro día de marzo e día de Entroido festivo en moitas localidades e moi concretamente na nosa Galicia, comezamos unha nova emisión coa nosa sintonía de sempre, as salutacións e desexando que o noso compañeiro Armando Fernández siga recuperándose. Dámoslle as grazas ao noso técnico Kiko Belinchón, que é o responsable de que esto saia adiante con ben e escoitamos un bocadiño de música para poñernos en contacto co noso correspondente na Costa da Morte, OSCAR M. REY CALO, que nos ilustra coa súa crónica semanal de novidades e acontecementos destacados desta semana. Xa saben que se os poden ampliar na páxina quepasanacosta.gal e que este programiña volven a emitilo mañá domingo en Radio Roncudo a partir das 10 da mañá. Agradecémoslle a súa colaboración e participación.

A segunda convidada é dona MARIA ISABEL PICHEL SOUSA, grande comunicadora e escritora. Parabenizámola por estar elixida para ser Pregoeira da "XLII Festa da Filloa de Lestedo". Cóntanos cousas moi interesantes deste acontecemento que foi declarado Festa de Interese Nacional o ano pasado. Hoxe mesmo estase a celebrar a Festa Infantil da Filloa con participación moi abondosa e reparto de filloas para os asistentes. Fainos disfrutar e aprender, coas súas explicacións, de como se debe apoiar e fomentar o que os nosos antergos foron quen de transmitir a elaboración popular e ancestral: ese bon facer das filloas. Unha importantísima anotación é a participación, neste evento, dos Xenerais do Ulla e os Correos. Convida a tódolos nosos escoitantes e seguidores a que se acheguen a Lestedo para disfrutar desa grande Festa. Agradecémoslle a súa participación de hoxe.

Continuamos, escoitando a peza musical "Entroido" interpretada polo Grupo Musical "Uxía Lambona e a Banda Molona", que son os encargados de amenizar esta Festa Infantil da Filloa de Lestedo. Falamos con Serxio, máis coñecido na Banda como "Serghaño" e tamén con Uxía, a vocalista. Agradecémoslle a súa participación de hoxe e desexámoslles que sigan colleitando moitos éxitos.

Máis música para recibir aos seguintes interlocutores: o noso correspondente nas Rías Baixas, XULIO SIMÓN RÚA, concretamente dende Combarro e o cetreiro IÑAQUI ORGE, Campión Nacional de Cetrería. Saudámolos e parabenizamos a Iñaqui polo seu trofeo, non só deste ano, senón tamén de varios anos atrás. Recibimos unhas explicacións cheas de ensino e aprendizaxe, porque a súa conversa é ilustradora e moi afable. Unha fermosísima afición que engaiola a tódolos amantes da natureza e da caza ecolóxica. As aves das que nos fala son fermosos exemplares que paga a pena contemplar cómo aprenden a realizar eses vos tan perfectos para a captura á que están ensinados. Agradecémoslle a súa participación de hoxe no noso programa e desexamos que siga colleitando moitos éxitos.

Novamente conectamos con Galicia para recibir as novidades e interesantes comunicacións do noso correspondente XOAN ARCO DA VELLA. Nesta ocasión fálanos do "Entroido de AGUASANTAS" no Concello de Cerdedo, Cotobade. Estivo recollendo documentación, fotografías e conversas con responsables deste acontecemento Entroideiro, que veñen de recuperar, posto que estaba esquecido e medio abandonado, dende os anos sesenta. Fálanos da Momada, das madamas e madamitos, das vellas vestidas de negro, doutros disfraces típicos todos vestidos de branco, da Corrida do Galo, do Sermón do Entroido e do Enterro do Entroido. Os interesados poden consultar todo esto na súa páxina persoal. Prométenos falar a vindeira semana doutro Entroido Rural moi interesante. Despedímolo desexando que teña un Bon Entroido e unha feliz semana.

Deixamos aquí o programa Completo-Enteiro.

SÁBADO 22 de FEBREIRO do 2025

Unha nova emisión deste programiño que pretende ofrecerlles dúas horas de Radio en Galego, con entrevistas, novidades, informacións e música. Comezamos coa nosa sintonía e as salutacións oportunas, desculpando a ausencia do noso compañeiro Armando Fernández, que aínda se atopa un pouquiño débil, pero dende aquí enviámoslle moitos ánimos para que se recupere canto antes e o mellor posible. Escoitamos, en primicia unha peza que nos envióu unha grande cantautora: "Fransy González" (de Xiradela), que acaba de publicar e que lle agradecemos e compartimos con todos vosoutros, para recibir ao noso correspondente na Costa da Morte, OSCAR M. REY CALO, que nos fai a súa crónica semanal con informacións moi interesantes.

Continuamos e escoitamos outra peza, primicia para tódolos nosos oíntes e seguidores, que corresponde a unha interpretación do Profesor e Mestre Gaiteiro e Flautista ÓSCAR IBÁÑEZ, xunto co tamén músico Portugués Daniel Pereira Cristo. Parabenizámolo porque acaba de estar participando, en BRAGA, no "Festival Cultural Galiza-Portugal" de Braga, e tamén o felicitamos porque o próximo día 15 de marzo dará un Concerto coa súa banda "Óscar Ibáñez&Tribo", no Auditorio Municipal do Concello de Vigo. Adiántanos que posiblemente teremos a oportunidade de escoitalo en directo no vindeiro verán, aquí e Barcelona. Cando teña xa concretadas as datas prometémonos voltar a falar con el para darlles máis información detallada. Desexamos que siga acadando moitos éxitos. 

Recibimos agora á nosa voz feminina do programa: MIRIAM RODRÍGUEZ, da Asociación C.G.Rosalía de Castro, que nos informa dos próximos acontecementos e actividades previstas: A Rúa do Entroido polas rúas da cidade de Cornellà, cos participantes da Entidade disfrazados e tocando os diversos instrumentos da Banda. O Xantar do Cocido, ao que teñen que apresurarse para apuntarse, porque xa case está cuberto o cupo de asistentes. A Asemblea Xeral para informar das actividades realizadas no ano pasado, as contas e as propostas e presuposto para este vindeiro curso. A Conferencia prevista para o día 29 de marzo, co título: "A Muller na música e na Vida", a cargo de Raquel, compoñente do Grupo Musical "As Cantareiras de Verducido". Despois haberá unha degustación de produtos ofrecidos polas mulleres e socios da Entidade. Seguimos escoitando algo máis de música.

Conectamos con Galicia para recibir cumprida información do Secretario Xeral do Partido Galeguista CHESQUI, Francisco López. Fálanos da recente presentación dun libro o pasado día 21, "Día Internacional do Idioma Materno". Proxectaron, tamén, un Documental proporcionado por "Xan Leira". Durante este ano teñen previsto realizar moitos actos con motivo do "Ano de Castelao", commemorando precisamente o 75 Cabodano de Castelao. Haberá presentación de libros, lecturas de poemas e música, acompañado de degustación gastronómica. Todo eso irá sucendendo ao longo de todo este ano 2025. Seguirá informándonos a medida que vaian facendo esas actuacións. Agradecémoslle a súa aportación.

Voltamos novamente a Galicia para falar con RAQUEL, da Asociación C.G. OS TORGUEIROS, en A Gudiña (Ourense). Felicitámola porque están a traballar na recuperación de varios elementos tradicionais e ancestrais relacionados co "Entrudio" e outros elementos específicos que teñen na zona, aínda que algo esquecidos. O pasado xoves celebraron o xoves de compadres, e para o vindeiro teñen previsto o "xoves de comadres". Agradecémoslle a súa amable atención e desexamos que sigan a disfrutar destas datas entroideiras cheas de engado popular.

Recibimos nos estudios ás "ROSALIEIRAS" da A.C.R.Rosalía de Castro de Cornellà". É unha honra e un pracer contar coa súa visita e presencia. Coméntanos algunha cousiña e deseguida escoitamos a interpretación dunha primeira peza: Valse de Moscoso.

Conectamos outra vez con Galicia, para recibir ao noso viaxeiro-etnógrafo e documentalista XOAN ARCO DA VELLA, que sempre ten algunha cousiña especial que descubrirnos. Nesta ocasión é a Ermida da XESTOSA, na comarca de Paradanta. Na parroquia de Prado, no Concello de Covelo. Esta capela é a máis elevada da provincia de Pontevedra, o chamado Faro de Avión atópase a máis de mil cen metros de altitude. Detrás da capela hai unha pedra de grandes dimensións que contén un sepulcro antropomórfico que se enche de auga milagreira para sanar enfermidades cutáneas, segundo a crenza popular. Agradecémoslle a información e despedímolo ate o vindeiro sábado.

Conversamos outro bocadiño coas "ROSALIEIRAS", que se presentan: Cris, Bárbara, Nuria, Andrea, Miriam, Inés e Aida, de momento porque posiblemente se incorporen algunhas máis, posto que hai canteira. Son as voces actuais deste grupo de cantareiras da Asociación que levan xa un tempo recollendo pezas musicais e interpretándoas en diversas actuacións nas que participaron ate o dagora. Precisamente teñen previsto actuar o vindeiro día 8 no "2ª Día Internacional da Gaita" que ten organizado a Asociación "Escola de Gaitas e Danzas Toxos e Xestas". Desexámoslles moitos éxitos. Volven a interpretar outra peza, en directo. Agradecémolles a súa visita.

Despedímonos escoitando a crónica do noso correspondente XULIO SIMÓN RÚA, nas Rías Baixas, Combarro concretamente, que nos fala de certas celebracións próximas, como a de mañá mesmo: O día de Rosalía, así como tamén doutras interesantes. Acaba propoñéndonos escoitar unha peza de música intepretada por Suso Vaamonde.

Deixamos aquí o programa Completo-Enteiro.

SÁBADO 15 de FEBREIRO do 2025

Comezamos unha nova emisión do programa coa nosa sintonía de sempre, as salutacións oportunas e disculpando a presencia do noso compañeiro Armando Fernández López, que hoxe non pode estar presente, por mor dunha posible indisposición de saúde, e que nosoutros lle desexamos unha pronta recuperación. Coma sempre estamos emitindo en directo pola Internet, e tamén polo Facebook, grazas ao traballo do noso técnico Kiko Belinchón. Poñemos un bocadiño de música que nos servirá para poñernos en contacto co noso correspondente na Costa da Morte OSCAR M. REY CALO, que nos fai coñecedor das noticias que el mesmo escolle para sabermos dos aconteceres daquelas terras galegas. Tamén nos lembra que se poden ampliar consultando a páxina quepasanacosta.gal, como nos indica cada semana, o mesmo que nos lembra a re-emisión deste programa mañá, domingo, a partir das dez da mañá en Radio Roncudo. Agradecémoslle a súa colaborción e desexamos que teña unha feliz semana.

Despois de escoitar un bocadiño de música, poñémonos en contacto con NOA LÓPEZ e co Tenente Alcalde de Taboada, don XOSÉ PORTELA GÓMEZ-MACÍAS, cos que mantemos unha entrevista-conversa moi interesante, para darnos a coñecer e convidarnos a asistir o día 2 de marzo á "33 FESTA DO CALDO DE OSOS" dese Concello. Coméntanos que esa festa gastronómica será algo máis que degustación, que terá moita cultura e diversidade, acompañada de música e de outras moitas actividades que se desenvolverán nese Domingo de Entroido. Agradecémoslles a súa participación e cumprida información no programa de hoxe e desexámoslles que teñan moito éxito.

Seguimos a emisión e poñémonos en contacto con don CARLOS HENRIQUE FERNÁNDEZ COTO, Arquitecto, Presidente de APATRIGAL (Asociación para a Defensa do Patrimonio Cultural Galego). Felicitámolo polo traballo que están a desenvolver e tamén pola recente entrega dunha escultura como Asociados de HONRA a dúas personalidades galegas moi recoñecidas: CARLOS NÚÑEZ e o investigador, escritor e ecoloxista don ESTANISLAO FERNÁNDEZ DE LA CIGOÑA. Veñen desenvolvendo ese traballo dende o ano dous mil dazaseis, que se constituíron como Asociación, asesorando a moitos colectivos e tamén a persoas que solicitan a súa intervención. Os interesados poden poñerse en contacto directamente mediante o correo apatrigal@gmail.com. Agradecémoslle a súa participación e desexamos que teñan moito éxito.

Poñémonos en contacto con NOEMÍ LÓPEZ VÁZQUEZ, unha ilustradora Luguesa que nos deu a coñecer Antonio Reigosa, posto que foi ela a que lle puxo imaxes a páxina "GALICIA ENCANTADA" que leva adiante dende fai 20 anos. Felicitámola por ese traballo tan engaiolante que enche de "encanto" (nunca mellor dito) esa fermosa información Histórica e Cultural da Galicia Encantada. Tamén nos informa doutras ilustracións que fixo, en libros diversos, de cartaces cheos de "comunicación pictórica" e coméntanos que segue traballando nesa súa interesante e fermosa creatividade ilustrativa. Agradecémoslle a súa aportación de hoxe no noso programa e augurámoslle moitos éxitos.

Intervén a nosa recente incorporación ao equipo de Semprengalicia, MIRIAM RODRÍGUEZ SÁNCHEZ, da Asociación C.G.Rosalía de Castro de Cornellá, que nos volve a lembrar a próxima celebración do Entroido para a fin de semana do mes de marzo, participando os compoñentes da banda e moitos socios na "Rua do Entroido da Vila" con música e disfrazados moi concretamente para ese evento. Tamén a festa gastronómica do "Cocido Galego" na Entidade, que teñen que anotarse para poder reservar. Outra cousa máis será a Conferencia que Carla (das Pandereteiras de Verducido) será a encargada de impartir a Conferencia do "Día da Dona" co título "A Muller na Música e na Vida". Agradecémoslle a súa participación.

Xoan e o Muiño de Vento

Continuamos e poñémonos en contacto con XOAN ARCO DA VELLA, ese noso correspondente que sempre ten "cousas curiosas" que aportar ao noso programa. Por certo, con motivo da súa intervención no anterior programa no que nos falou do Entroido dos Farrumecos de Sobradelo, en Xunqueira de Ambía, fainos saber dasa felicitacións que lle enviaron a el personalmente. Vainos a facilitar o contacto e tentaremos falar coa persoa indicada. Comenta varias cousas que xa ten publicado, pero fai unha mención especial aos "Muíños de Vento", que tamén en Galicia tiveron a súa importancia. Aproveita para nos comentar a existencia daqueloutros Muiños moi importantes na Mariña, que teñen o aproveitamento das Mareas para poder facer o seu cometido. Agradecémoslle a súa estimada colaboración.

 

Recibimos a colaboración do Poeta da Mariña Luguesa, PACO RIVAS, que coma sempre, nos recibe moi amablemente e felicitámolo pola recente publicación do seu libriño de haikus: "BEIXOS GALLADOS", ilustrado por M.Manxela e editado por Medulia. Fainos o agasallo ao que nos ten acostumados, de ler varios deses haikus da súa autoría.

 

Depedímonos de tódolos nosos oíntes e seguidores ate o vindeiro sábado á mesma hora.

Escoitamos a colaboración Cultural e noticiosa, do noso correspondente nas Rías Baixas, concretamente dende Combarro, XULIO SIMÓN RÚA. Unha escolla moi interesante que ademais finaliza coa proposta de escoitar unha peciña musical.

Deixamos aquí o programa Compelto-Enteiro.

SÁBADO 8 de FEBREIRO do 2025

Comezamos coa nosa sintonía, as salutacións e un bocadiño de música para recibir ao primeiro colaborador, dende a Costa da Morte, OSCAR MANUEL REY CALO, que nos fai unha crónica sucinta de novidades e informacións, resumidas e escollidas, para sabermos algo máis daquelas terras galegas. Felicitámolo polo traballo compartido con Fina Paulos Lareo, o libro recentemente publicado: "A Intelixencia Artificial para a Sociedade", que están a presentar por diversos Institutos e cidades. Agradecémoslle a súa estimada colaboración semanal e desexamos que sigan colleitando éxitos con ese libro que vai a ter unha segunda edición, se seguen así de solicitados. Esta emisión radiofónica, lémbanos, será re-emitida mañá domingo en Radio Roncudo, a partir das 10 da mañá. Pódense ampliar as informacións via Internet visitando a páxina que eles manteñen: quepasanacosta.gal.

A segunda intervención é do noso incansable correspondente-reporteiro XOAN ARCO DA VELLA, que nos prometera a semana pasada, falar dun Entroido moi particular e moi antigo, recentemente recuperado. Trátase dos "Farrumecos" de Sobradelo en Xunqueira de Ambía (Ourense). Un percorrido informativo moi interesante, ligado ás coplas e "brindis" que eses farrumecos lles adican aos veciños para resaltar algunha que outra descrición poética que inclúe unha certa retranca e descuberta dalgunha situación especial acontecida durante o ano anterior. En vindeiras datas continuará, segundo nos dixo, coa aportación singular do Entroido na provincia de Pontevedra. Estaremos atentos.

Escoitamos unha peza musical e namentras damos a coñecer unha última hora relacionada co "XXI Festival del Botillo-2025", organizado por ASOBECAT (Asociación de Bercianos en Cataluña), anunciando a Conferencia-Presentación, o día 16 de febreiro a partir das 11h, no Hotel Front Air Congress de Sant Boi,  do libro publicado por don Miguel Angel Revilla: "Porqué pasa lo que pasa". Aínda que a recepción dos asistentes farase a partir dasa 12h coa presencia da Banda de Gaitas da Federación de Entidades Galegas (FEGALCAT). Os interesados poderán asistir á presentación que ofrecerá o autor, e adquirir o seu libro para que lle-lo asine o propio autor.

Continuamos o programa poñéndonos en contacto con RUBÉN DE LLANOS, da Asociación Cultural Galega "AGARIMOS" de Badalona, para que nos informe dalgúns actos que teñen previsto realizar. Próximamente a celebración do "Entroido na Rúa de Badalona"; están a confeccionar os traxes e disfraces para a ocasión. Tamén a "Festa de AGARIMOS" prevista para o día 17 de maio na praza de Trafalgar de Badalona, pertiño do local social da Entidade. Agradecémoslle a súa notificación e desexaos que teñan moito éxito.

A seguinte convidada é ANDREA LÓPEZ, compoñente do Grupo Musical LERIA, que veñen de actuar onte mesmo, xunto coa Banda da Loba, no Playa Club da Coruña. Foi a celebración da "Festa dos Medios en Galego" organizada por AMEGA, e que tivo un grande éxito de participación. Fainos unha pequena descrición da traxectoria deste Grupo musical Indi galego, que está a ter unha boa acollida. Xa teñen publicado varias pezas e a máis recente titúlase: Luces de Neón. Pronto nos facilitarán máis novedades musicais. Desexamos que teñan moito éxito.

Despedímonos de tódolos nosos oíntes e seguidores desexando que teñan unha feliz semana.

Damos a coñecer a realización dunha simpática e curiosa Festa: "A Procesión dos Lacóns de Valga", que se celebrou o pasado día 2 de febreiro na parroquia de Cordeiro. Unha tradición que se mantén dende o século XIX, cando unha epidemia que afectou ao gando levou aos veciños a implorar a intercesión divina. Foron algo máis de dúas horas de percorrido as que tardaron en completalo, sete paradas nos lugares de Vilar, Vilarello, Moldes, As Eiras, Outeiro, Ferreirós e Beiro.

 

Deixamos aquí o programa Completo-Enteiro.