25 de outono 2008

Esta semana comezamos cunha axenda ateigada de informacións e comunicacións. Acompáñamos MANOEL CARRETE, historiador, licenciado en dereito, escritor e un colaborador inestimable. A primeira cousa que nos informa é das celebracións que teñen previstas os da Asociación de MOLLET: A festa do Mogosto, a Misa cantada polo Coral da mesma Asociación no vindeiro domingo e que será grabada pola TV3... Tamén nos visita MANUEL RIVELA LÓPEZ, un naturista que ven a ofrecer as súas sabenzas a tódolos nosos oíntes. Ten o seu local na Avenida San Ildefonso, 12.Local 32 de Cornellà : "Mar Salut Integral", e o seu teléfono é 934712524. Un adianto: na vindeira fin de semana voltará a poñerse en contacto con tods para informanos do data e hora da súa "CHARLA-CONFERENCIA" sobre a saúde naturalista no local social de "Rosalía de Castro", na rúa Federico Soler 71.

A primeira entrevista-charla é, tal e como prometíamos a semana pasada, con JUAN PRIETO, Presidente da Asociación Cultural AGARIMOS, de Badalona, perante a que nos enteramos da celebración do "Concurso-Festa da Empanada e do Roscón" na Entidade, celebrado o día 11 pasado, e o convite a tódolos galegos que o desexen ao "Magosto" que celebra a Entidade o día 8 de novembro próximo. O enderezo : Rúa Paris 45 baixos. O seu teléfono: 934602022. As características desta festa teñen unha especialidade moi particular, xa que acostuman a "disfrazarse" algunhas persoas de "Castañeiras" namentres se asan as castañas nun tambor axeitado para así poder degusta-las castañas recén feitas e quentiñas. Os "bullotes" repartense para tódolos asistentes xunto cun "bolo preñado" e viño para acompaña-la degustación.

*As informacións que nos chegan de Galicia teñen un tinte luctuoso, xa que enterámonos do falecemento de CONSTANTINO GARCÍA, académico fundador do ILG e do pasamento de RUBÉN GARCÍA, director da Mostra de Teatro de Rivadabia.
*Sen embargo as seguintes son de celebracións xa que AGUSTÍN FERNÁNDEZ PAZ, é galardoado co Premio Nacional de Literatura Infantil, dotado con 20.000 euros. O xurado valorou o libro de relatos O único que queda é o amor,que publicou o pasado ano en galego.
*Tamén celebramos a entrega do Premio Nacional de Ensaio a JUSTO BERAMENDI GONZÁLEZ, polo seu traballo "De provincia a nación. Historia do Galeguismo Político". Xa tiña recibido o Premio da AELG, no mes de abril pasado, e o Losada Diéguez no mes de xuño.
*Noutra orde de cousas demos a coñecero acordo que acaban de asinar a Editorial Galaxia e o potente buscador da Internet Google, para achegar os seus libros á rede. Segundo informan dende a editorial, estarán dispoñibles para consulta obras completas, aínda que noutros casos subiranse fragmentos, segundo decidan os seus autores.
*A revista rock dos Países Cataláns distribuirá un CD de música galega actual. Baixo o epígrafe "A nova fornada de pop en galego", o disco reúne a 18 artistas como exemplo de calidade das bandas galegas así como do amplo abano de estilos que interpretan.
* Ponte...Nas Ondas, crea a figura de "Tesouros vivos", para recoñecer os portadores do saber tradicional. Santi Veloso afirmou que seguirá a traballar para que o patrimonio inmaterial galego-portugués sexa recoñecido como Obra Mesta da Humanidade pola UNESCO. Entre as vindeiras accións que prevé desenvolver o colectivo está a creación da figura de "Tesouros vivos da Eurorrexión", que recoñecerá as persoas que conservan e transmiten os coñecementos tradicionais.

Conectamos con Galicia e pómonos en contacto con XOSÉ MANUEL MERELLES, responsable de Prensa de Turgalicia. A conversa é para informarnos de tódalas ofertas e posibilidades ás que se poden acceder dende a súa páxina: www.turgalicia.es. Fainso partícipes das moitas posibilidades que existen para visitar e disfrutar en Galicia. Comunícanos que Turgalicia estará presente no 15 SALON INTERNACIONA DE TURISMO de Cornellà - AGROTUR 2008, e que tódolos visitantes poderán recoller de primeira man, os folletos informativos relacionados principalmente co turismo de interior. Unha longa conversa na que fixo un relatorio extensivo das moitas e marabillosas ofertas de estancia e disfrute na nosa terra. Quedamos en poder contactar en sucesivas ocasións para podermos continuar informando, aos nosos oíntes, desas novidades.

O noso amigo RUBÉN ALONSO DE PONGA, danos a noticia de que esta mesma noite preséntase no local social do "Centro Leonés de Barcelona" a súa terceira novela "El canto de la Carabiella", unha obra deste escritor e histórico practicante de loita leonesa natural de Valbuena del Roblo. As pegadas e quebrantos da Guerra Civil na montaña leonesa forman o eixo desta obra editada por Wenaewe.

A entrevista máis salientable desta xornada estivo centrada coa participación de XULIO SIMÓN, que nos achegou á figura e persoa de don AVELINO POUSA ANTELO, que perante máis de 35 minutos estivo falando con todos nós e dándonos pinceladas moi xugosas dalgunhas das moitas vivencias. Grabámola e estamos traballando para podermos facer eso que temos prometido: Colgala para que se poida descargar e escoitar directamente. Seguimos a traballar nese eido e seguro que non tardaremos en poder ofrecérllela, xunto coas outras prometidas.

*** Envíalle un agarimoso saúdo a ANABELEN e aos compoñentes do grupo de Teatro Anduriña, de Rosalía de Castro-Cornellá, porque están a repasar e ensaiar a obra de teatro que voltarán a interpretar na inauguracións das novas instalacións da Asociación Cultural Galega da Llagosta, os días 14,15 e 16 de novembro. Desexámoslles moitos éxitos nesa nova xeira.
Premer aquí para escoitar unha parte do programa

IRIA intervén para darnos unhas pinceladas dunha poeta catalana contemporánea: María Mercè -Marçal (Barcelona 1952-1998). Unha declamación feiticeira de dúas das súas creacións poéticas a nº 13 "Naufragi Astral" e a nº 15. Tamén as temos grabadas e prometemos publicalas, ou colgalas, como as outras.

*Rematamos o programa de hoxe coa intervención de PACO RIVAS e regálanos estas dúas composicións:
Nun búcaro gardo un bico
que un día me tiñas dado,
enchino de auga de rosas
e o bico queda medrando.

Se te vas déixame a cor dos teus dedos
se te vas déixame a flor dos teus labios.
E o corazón nun latexo.

Xa non quero estar sen ti
porque avida sen ti váise,
porque o día faise noite,
porque a xente faise naide,
porque o ceo faise inferno,
porque a min quéimame o aire.

Ata a vindeira semana. (o 8 de novembro, porque o día 1 é festivo)

18 de outubro

Un día máis, o noso programa comeza con novidades interesantes: Acabamos de poñer en marcha un novo "xogo" interactivo entre os socios-oíntes e simpatizantes para que participen connosco chamando por teléfono ao noso programa e así poder recibir como agasallo un libro e un CD de música galega: No Bico un Cantar (17 canccións de 17 autores galegos, editado con motivo do día das Letras Galegas, o 17 de maio).
É un adianto da proposta que recibimos por parte de Manuel, o responsable do Bar-Restaurante ROSALÍA DE CASTRO, na rúa Federico Soler, 71. Os oíntes teñen que chamar ao número 933 778 200, ou enviar un "email" a semprengalicia@gmail.com, para poder recibir ese agasallo. Xa entregamos unha bolsiña co primeiro premiado e que, casualidades de vida, tocoulle a un tocaio meu, Xulio o gallego, segundo se dentificou e que ademais aproveitou para pedir unha peza de música dunha banda de música. Quedou compracida a súa demanda e tamén lle deixamos o agasallo no Bar-Restaurane. Coido que o "xogo-concurso" será ben recibido e tiraremos proveito del todos.

Nesa primeira hora tivemos a ocasión de falar con Juan Rodríguez Gómez Dacal, Vicepresidente do Centro Galego de Lleida, quen nos informou das moitas actividades que están a desenrolar. Comentounos que estiveron no Val d'Arán, representando a tódolos galegos de Catalunya, pois aproveitando que celebraban o "DÍA DE BREOGÁN", de cada ano, nesta ocasión fixeron a súa actuación na igrexa de Vielha e ao final deron un concerto na mesma igrexa do seu repertorio, rematando o acto co himno aranés, cousa que fixo chorar a máis dun dos asistentes, pola fermosa interpretación que fixeron. O día 12, como teñen por costume cada ano, voltaron a ter unha actuación memorable: O Coral CENGALLEI, foi o encargado de cantar na misa solemne que concelebrou na catedral o recen nomeado bispo de Lleida. Outro éxito máis. Tamén nos puxo ao corrente das seguintes actuacións que teñen previstas: Un Curso intensivo de Lingua galega nos meses de novebro e decembro próximos; O día 1 de novembro O Magosto tradicional, ao que son convidados gratuitamente tódolos socios e simpatizantes, pero que ademais fanno partícipe dos costumes desta terra xa que ademais das imprescindibles castañas asadas, acompañan a degustación cos famosísimos e prezados "panellets", regado todo elo con bo viño galego e moscatel. Despois adiantounos que xa teñen todo preparado para a celebración da Semana Cultural da Federación de Casas Rexionais de Lleida, dende o 12 de novembro ata 23, que rematan cunha cea conxunta no famoso restaurante "Forn de Nastasi".

Tiñamos previsto conectar con outro Juan, o Presidente da Asociación Cultural Galega AGARIMOS, de Badalona, para que nos informara do Concurso de Roscóns e Empanadas que se celebra mañá 19 de outubro, na Sé da Entidade, pero non nos foi posible. Quedamos para a vindeira semana e coido que foi mellor porque así teremos a oportunidade de que nos comente qué participación tiveron e cómo foron os premios.

A seguinte comunicación foi con Ricardo Pérez, Presidente da nosa Asociación Cultural Galega ROSALÍA DE CASTRO, que nos informou da excursión que mañá farán a unha localidade catalana de prestixio e na que pasarán un día de irmandade. Como a "matriculación" foi moi abondosa e como queira que o Restaurante contratado non tiña espazo suficiente para atender a tantas persoas, decidiron dividir a visita en dúas tandas, de modo que a vindeira semana sairá un segundo autocar cara a mesma localidade, para disfrute dese día en boa compaña e harmonía.
Aproveitamos para falar coa directora do grupo de teatro Anduriña, dona Amelia. Díxonos que xa teñen comprometida unha próxima actuación na Llagosta.

Logo tivemos a ocasión de falar con Manuel que nos transmitiu a idea e a suxerencia de que puxeramos en marcha un concurso para que os nosos oíntes se poñan en contacto connosco e teten de adiviñar a resposta a unha pregunta que faremos ao comezo do programa próximo. As persoas participantes deberán contestar correctamente unha pregunta moi sinxela, relacionada co programa, con Galicia ou coas informacións que imos dando. As persoas acertantes participarán nun sorteo e os gañadores recibirán unha invitación consistente en : "UNHA MERENDA NO BAR-RESTAURANTE ROSALÍA DE CASTRO". Comezamos con ese pequeno detalle, e se cumplen as espectativas e os efectos desexados pedirémoslle a Manuel que amplíe a oferta ou agasallo. De momento temos eso concertado e agardamos que participen moitos oíntes.

Xulio Simón tivo a grande idea de falarnos de cousas moi interesantes relacionadas coa coincidencia e celebración do ano Rodoreda. Disfrutamos das súas verbas, que adornou cunha serie de poemas alusivos a toda a súa disertación. Quedamos en que nos enviaría ese traballiño e prometemos colgado neste noso humilde "blog", para que os que así o desexen poida votar man del.

Xosé Lamela, antiguo director do noso programa "Sempre en Galicia" complementounos a información que tiñamos sobre o Plan Director, e outros plans plans sobre a Vía Nova, xunto con outros proxectos incluídos no Interreg demandado á Comunidade Europea. Desexámoslle moitos éxitos e queremos que pronto teñan unha resposta afirmativa e con moito orzamento, para levalo adiante. Meréceno.

Os ultimos minutos corresponderon ao noso RECUNCHO POÉTICO, que corresponde a PACO RIVAS facéndonos partícipe das súas creacións e IRIA, que tamén nos da unha visión moi interesante nese eido da creación poética. Nesta ocasión escoitamos, na súa melodiosa voz declamatoria, dous poemas en galego de García Lorca, pero para introducilos escoitamos primeiro a lectura dunhas fermosas verbas de Kike, cando estivo en Granada.
Un broche final do que participamos tódolos que a escoitamos.
Ata a vindeira semana

Temos xa o traballo de XULIO SIMÓN. De momento ofrecémosvolo deste xeito:

1908 ANO DE NACEMENTO DE MERCÈ RODOREDA

GALICIA
Nacen:
Xenaro Mariñas del Valle (A Coruña; idem 1999).
Xosé Otero Abeledo “Laxeiro” (Lalín; Vigo 1996).
Urbano Lugrís González, fillo de Manuel Lugrís Freire (A Coruña; Vigo 1973).
Benigno Andrade García “Foucellas” (Foucellas-Cabrui-Mesía-A Coruña; 1952 A Coruña).
O actor Tomás Ares Pena “Xan das Bólas” (A Coruña; 1977 Madrid).
Juana Teresa Juega López ía saca-lo seu 1º libro de poesía : Alma que llora, con prólogo de Leopoldo Pedreira, pero o seu noivo opúxose, e ante a resistencia dela, feriuna gravemente e despois suicidouse.
Xesús Rodríguez López: Gallegadas, con alegrias de la tierra.
Emilia Pardo Bazán: La sirena negra.
Valle-Inclán: Romance de lobos.

Morren:
Manuel Curros Enríquez (A Habana; Celanova 1851):
“ ¡Mala morte mate á Morte!:
veu por Curros, ¡viña tola!,
e Galicia queda sola,
i o Estro Viril sin norte;
mais…¡leria!, que aínda foi sorte prós que o Vate apouvigara:
raposos, ¡a loita para!,
caciques, ¡ollar vos toca
como cai terra na boca
de quen vos cuspeu na cara!”
(No enterro de Curros A. Noriega Varela).

A revista Galicia da Habana, dirixida por Constantino Horta, adícalle un número monográfico o 15 de marzo a Curros Enríquez, falecido o día 7 no Hospital do Centro Asturiano. A esta revista pertencía a bandeira galega que envolvía o ataúde do poeta en que foi enviado á Coruña.
O día 20 de marzo reclamado pola Academia Gallega, que presidía Murguía, embarcan os restos no vapor “Alfonso XIII”, rumbo á Coruña, a onde chega o 31 de marzo, acompañado polo presidente do Centro Gallego López Pérez, o músico Chané e o poeta Nan de Allariz:
“¡O terrón! Se a sorte cruel
me fai o mundo deixar
fóra del e de meu lar
galegos, ¡leváime a el!
¡ Alí podrei descansar!”
(Curros).


Co gallo dos traslados dos restos de Curros Enríquez a Galicia dende a Habana, Salvador Rueda escribiu a etopeia que comeza así:

“Espíritu abrasado de sed de lo infinito,
alma que ardió inextinta, cual taza de incensario,
llevaste en tus entrañas un buitre solitario,
que retorció tus labios en un eterno grito.

Formó una iglesia fría, con aras de granito,
tu congelado culto, sin luz y sin sagrario;
rezaste con blasfemias, grandioso visionario,
y en versos inmortales quedó tu rezo escrito.

Están en tus estrofas, cual garfios vengadores,
colgados, como en las horcas, los viles y opresores,
que son de la justicia baldón y vilipendio.

Lanzas los truenos hondos del agrio Jeremías,
escupes a los cielos las brasas de Isaías,
y tienes en la lengua los filos de un incendio.”

Aparece a revista “Compostela”, co subtítulo de “Revista literaria”.
Nace “El Eco de Villalba”, dirixido por Manuel Mato Vizoso.
O 17 de agosto aparece en Lugo como diario “El progreso”.
Pecha a librería de Carré Aldao, coñecida como a Cova Céltica.
Basilio Álvarez, pasa a dirixir a revista “Galicia”.
Francisco Camba: Camino adelante. A través de Galicia (Madrid).
Atentados anarquistas na Coruña e unha folga xeral.
Primeira Asemblea Agraria de Monforte.
Aparece en Buenos Aires a revista semanal “Aires da miña terra” fundada e dirixida por Manuel Nóvoa Costoya, quen lle puxo o nome en honor a Curros Enríquez (10 de maio ata o 25 de xullo de 1909).

O 8 de marzo morren 129 mulleres nun incendio dunha fábrica téxtil en Nova York na que se encerraran para reclamar iguais dereitos laborais que os homes, o que dá orixe á instauración do Día da Muller Traballadora.

Carlos I, rei de Portugal e o príncipe herdeiro Luís Felipe son asasinados en Lisboa.
Atentados en Barcelona.
Créase a “ Sociedad Española de las Minas del Rif” para explotar as minas de ferro marroquinas.

OUTRAS LITERATURAS

Nacen:
Casais Monteiro (Porto; 1972 São Paulo).
Joaquim Paço d’Arcos (Lisboa; 1979).
João Guimarães Rosa (Brasil 1967).
Agustí Bartra (Barcelona; 1982).

Mercè Rodoreda (Barcelona; 1983 Girona)

Pedro Laín Entralgo (Urrea de Gaén, Teruel; 2001 Madrid).
Simone de Beauvoir (París; id. 1986).
Cesare Pavese (Italia; 1950).
Ramalho Ortigão: El-Rei D. Carlos o Martirizado.
Àngel Guimerà : La reina vella (teatre).
Apel-les Mestres: La presentalla (teatre).
Alfons Maseras: Edmon (novela decadentista).
Salvador Galmés: Negrures (narrativa).
Adrià Gual: Els pobres menestrals (teatro).
Ignasi Iglésias: En Joan dels miracles (teatro costumista).
Joan Puig i Ferreter: La dama enamorada (teatro) e Aigües encantades (teatro).
Guerau de Liost: La muntanya d‘ametistes (poemes).
Eduardo Marquina: Las hijas del Cid.
Jacinto Benavente: Señora Ama
Los Quintero: Amores y amoríos.
Juan Ramón Jiménez: La soledad sonora e Elejías puras.
Gabriel Miró: La novela de mi amigo e Nómada.
Enrique Larreta: La gloria de don Ramiro. (narrativa).
Ezra Pound: Coa luz apagada (poesía).
Rainer Maria Rilke: Novas poesías.
Edward Morgan Forster: A room with a view (Un cuarto con vistas). (narrativa).

Morren:
Trindade Coelho (Lisboa; 1861 Mogadouro).
Joaquim Maria Machado de Assis (Río de Xaneiro; id. 1839).

11 de outubro do 2008

Unha semana máis voltamos a estar cos nosos oíntes.
Comezamos informándolles do programa.
A verdade é que desta volta non puidemos estar en directo.
Este programa está "enlatado", pero ten contido abondo importante como para facelo interesante para tódolos nosos oíntes.

A primeira entrevista foi con MONTSE RIVERA, a pandereteira do grupo LEILÍA, que sudamos despois de escoitar unha das pezas do CD "Son de Leilía", pero nesta ocasión o que nós pretendíamos era que nos fixera partícipes dun proxecto interesantísimo: "PES DE LA", que consiste en poñer a bailar a tódolos que os escoitan. Xa fixeron as primeiras actuacións no verán e concretamente nesa tarde do día 11 de outubro intervirán nas "Festas de exaltación do MARISCO de O GROVE". Unha conversa moi agradable e chea de novidades. Despedímonos dela con outra peza do mesmo CD. E xa nos comprometimos para poder facer novas comunicacións en vindeiras ocasións.

A segunda chamada foi para falar con ANXOS SUMAI, a escritora convidada pola Consellería de Cultura ao LIBER 2008, e que aproveitamos para falar con ela das moitas cousas que estivo a facer esta semana en Cataluña: A Conferencia na Universidade Central, a súa intervención e Charla para os alumnos da Universidade de Bellaterra, a Conferencia no Ateneo Barcelonés da rúa Canuda, a presentación do seu libro "Así nacen as baleas" no Centro Galego NÓS de Sabadell, e a presentación de dous libros na Asociación Cultural Galega Rosalía de Castro en Cornellà. Falounos da súa escrita, da súa experiencia en Barcelona e desexámoslle que siga a colleitar moitísimos éxitos máis.

O resto da programación estivo salpicado de comunicacións, lectura de contos, e algunha que outra información que nos chega dende Galicia á nosa Redacción. Todo elo acompañado pola variada e moi abondosa escoita das numerosas grabacións das que dispoñemos. Seguramente teremos que facer algunha que outra adquisición, para repoñer e actualizar as moitas novidades que se veñen sucedendo no eido musical galego, pero deso xa se encargará, dagora en adiante o noso colaborador inestimable Serxio Seoane, quen se comprometeu en anteriores intervencións, a traernos precismanete esas músicas que compartiremos con todos vosoutros.

A vindeira semana prometemos estar en directo e facer un progama moito máis entretido, e abordando tódolos apartados completos: As entrevistas, as conversas, as lecturas, a música, as comunicacións con Galicia, as novidades e o RECUNCHO POÉTICO con que sempre rematamos esas dúas horiñas de programa.

Ultimamente estamos a recibir varios correos nos que solicitades que colguemos xa as entrevistas e algunha que outra cousa das que prometimos en anteriores programas. FARÉMOLO, prometémolo, pero aínda non puidemos mercar os instrumentos tecnolóxicos precisos para acadalo. Pedímosvos un "bocadiño" máis de pacencia... Non lle poñemos data segura, pero en dous ou tres meses conseguirémolo, e aproveitaremos para colgar os que temos atrasados, porque eso si, témolos gardados convenientemente para cando poidamos cargalos. Dádenos un pouquiño máis de tempo que seguro que o conseguiremos.

Ata a vindeira semana. Por certo: Podedes enviar as vosas suxerencias para a emisión do noso-voso programa, que tentaremos facelas realidade.

4 de outubro do 2008

A primeira colaboración-conversa foi con Juan Carlos, o responsable de comunicación de Cristina Pato. A noticia foi unha primicia para tódolos nosos oíntes: O día 14 sairá ao prelo un novo disco no que Cristina, afincada en Nova York dende o ano 2004, colabora co prestixioso “chelista” YoYoMa.
A seguinte noticia, xa que estabamos a falar de gaitas: O gaiteiro Pablo Devigo (Castro Caldelas 1990) , consegue o trofeo McCrimmon do Festival de Lorient. Xa fora gañador, este ano 2008 do festival de gaita de Bandeira, do concurso de gaita na Estrada, do Manuel de Villanueva de Poio e o de composición, organizado polo concello de Ferrol e que leva por nome “Constantino Bellón”. O ano pasado acadou o primeiro premio, no concurso de Soutelo de Montes. Precisamente escoitamos a súa composición: “Novo Milenium” que pertence ao corte nº 7 do CD II Encontro de Gaiteiros Manuel de Villanueva, que nos agasallo este verán un bo colaborador, Cándido Ameixeira de Edicións do Cumio.
Fixemos unha nova comunicación con Galicia, e nesta ocasión falamos con Silvia, de Expo-Ourense, quen nos puxo ao corrente das moitísimas actividades que se estaban a realizar no marco da feira Internacional de TERMATALIA. Unha fita importantísima, a nivel Internacional que se celebra en Galicia, e Ourense convértese, por uns días en “Capital Termal”, na que se presentou a VIII edición da Tematalia, que o Príncipe de Asturias aceptou se-lo Presidente de Honra de Termatalia, que á inauguración asisitiu o Vicepresidente da Xunta Sr.Quintana, que nesta ocasión asistiron e presentaron as súas novidades as ciddes de Jürmala (Letonia), Villa Elisa (Arxentina), Kusatsu (Xapón), Salto (Uruguay), Auga Chaves (Verín-Portugal.España). Tamén nos informou da presentación do Sistema de Calidade para as Vilas Termais de España, a cargo do Presidente da sección de Municipios con Augas Minero-Medicinais, don Francisco Escobedo. A exposición conta cunha morea de espazos todos dedicados aos balnearios e ás súas múltiplas novidades: zona de fisioterapia, bar de augas (envasadas en diferentes países), bolsa de emprego… … e visita guiada para os que desexen achegarse ao balneario centenario de Curtis (A Coruña) ou a posibilidade de disfrutar percorrendo os balnearios que existen en Galicia ao carón do Río Miño. Quedamos en voltar a poñernos en contacto con Silvia para que nos informe da seguinte Mostra ou Exposición, no vindeiro mes dos santos, dedicada aos maiores.
Novamente escoitamos unha interpretación de Anxo Pintos, peza que se atopa no CD “Foliada nas Rías Baixas” homenaxe ao mestre Ricardo Portela, xunto con 22 gaiteiros máis.
Falamos con Anxos Sumai, a nosa amiga, escritora, tradutora e documentalista galega, que moi amablemente nos informou da próxima visita a Barcelona, con ocasión da súa participación no LIBER-08. O seu calendario está ateigado de actuacións: O martes 7, na Universidade de Barcelona, un acto baixo o título “Dentro do Acuario”. O mércores 8, na Universitat Autónoma (Bellaterra), na que participará coa ponencia que leva por título “A onde van as palabras…”. O venres 10, no Ateneo Barcelonés (rúa Canuda,6), Sala Pompeu Fabra, ás 20 horas, charla que leva por título: “Notas para unha melodía das baleas”. E por fin o sábado día 11 terémo-lo pracer de escoitala e falar con ela persoalmente no Centro Galego Nós de Sabadell ou na Asociación Cultural Galega Rosalía de Castro, ás 20 horas, que nos presentará o seu libro : “Así nacen as baleas”.
A continuación tivemos a visita de KIKE, o noso amigo e colaborador de sempre e que veu acompañado e presentounos ao “locutor máis novo do noso programa”, de catro aniños e que el mesmo se deu a coñecer: “Chámome XIAO e mándolle un saúdo para Matuca, para Iria e para tódolos galegos que están a escoita-la radio”. Contamos que non sexa esta a única ocasión que nos visite e agardamos que en vindeiras ocasións poidamos disfrutar da súa presencia, xa que o seu desenvolvemento e a súa frescura no emprego do idioma é un deleite para os ouvidos dos oíntes.
A nosa conversa con Xulio Simón estivo acompañada de diversas intervencións e saúdos cordiais por parte de Kike e un servidor, e aproveitamos para felicita-lo pola celebración das Festas de San Froilán, así como polo seu ben aproveitado descanso estival no que sempre se achega a algún país Europeo para darlle un paseo en bicicleta (este ano tocoulle Letonia, e convidou a tódolos oíntes a que fixeran esa visita non só pola beleza das vistas, senón por tódolos atractivos que ofrece). Despois, e facendo un esforzo para non quedarse sen voz, fíxonos unha pequena semblanza da Festa de San Froilán en Lugo, dándonos citas de diversos autores e escritores galegos, lembrando as belezas e disfrute delas.
Xa para rematar, no “RECUNCHO POÉTICO”, tivemos a intervención de IRIA, a nosa poeta galega en Catalunya, que nos deleitou coa declamación dun poema surrealista, do dadaista André Breton, que deunos pe para convidarvos e que voltedes a conectar o “Sempre en Galiza” a vindeira semana, na que tentaremos facervos pasar dúas horiñas agradables, con música galega, as noticias que nos cheguen á redacción e as novidades máis interesantes que atopemos.