10 de XANEIRO do 2015

Colgamos hoxe o programa "atrasado" do primeiro sábado de xaneiro, que non puidemos poñer no blog por mor doutras obrigas que tivemos.

A primeira comunicación-conversa é con JUAN PEDRO, da "ASOBECAT", que xunto co equipo formado por LAURA SANTOS e ARMANDO FERNÁNDEZ, entrevistan e falan con don ROMÁN DÍAZ, Alcalde de Castropodame, Concello homenaxeado este ano no "XII FESTIVAL del BOTILLO en CATALUNYA", que se celebrará o vindeiro día 31 no Hotel FRONT AIR Congress, de Sant Boi de Llobregat.

A segunda intervención é a chamada que cada semana mantemos con XULIO SIMÓN, e que nesta ocasión ten como convidado especial a KIKO DA SILVA, co que xa temos fallado nalgunha ocasión, pero que neste caso en particular, servirá para comentar algunhas cousas relacionadas co terrible suceso de Francia, relacionado coa comunicación.

A terceira e ultima parte dedícaselle a falar con don JOSÉ LUÍS, das Bodegas del Bierzo, outro dos homenaxeados na mencionada "XII FESTIVAL del BOTILLO en CATALUNYA". Unha honra para o noso programa poder contactar e entrevistar a tan ilustres convidados, gracias, claro está, á colaboración e intercesión do noso convidado JuanPedro, da ASOBECAT.

Sábado 20 de decembro do 2014

O último programa do ano. Comezamos dándolles a ben-vinda a tódolos nosos oíntes e seguidores, todo este equipo: LAURA SANTOS, XOSÉ LAMELA, ARMANDO FERNANDEZ e un servidor. Nos controis técnicos, coma sempre, MARC FORT. Tentaremos facer un programa cheo de desexos Navideños para todos e moi especialmente para aqueles amigos e seguidores moi particulares. Ofrecémoslles escoitar unha primeira peza do disco CANTIGAS DE NADAL, e con ela queremos felicitar á cantautora GUADI GALEGO, dándolle unha sorpresa, pero non demos contactado con ela. Probamos logo con outra persoa e tentamos poñernos en contacto coa Directora do Grupo de Teatro "Anduriña" dona AMELIA López, a quen felicitamos con efusión e cariño. Aténdenos con amabilidade e desexámonos mutuamente unhas Boas Festas e próspero vindeiro Ano. 

A seguinte comunicación é co Presidente da Asociación Cultural Galega Rosalía de Castro -don ALFONSO RICO-, que aproveita non só para felicitar as FESTAS a tódolos oíntes, seguidores e socios, senón que tamén nos fai un pequeno adianto das inmediatas actividades que teñen previsto realizar na Entidade. Agradecémosllelo e desexámoslle o mesmo. 

Comunicámonos con don JOSÉ MARÍA EGUILETA, grande colaborador desta nosa emisión. Aínda que coa voz un chisco tomada por mor do catarro que lle incomoda, danos tempo de felicitalo e correspóndenos desexándonos o mesmo.

Despois chamamos ao noso correspondente nas Rías Baixas, XULIO SIMÓN, que como sempre ten preparada a súa intervención ofrecéndonos un bocado de saber cultural galego. Aproveitamos para desexármonos unhas Felicies Festas e un Feiticeiro Aninovo 2015. 

Na segunda hora conectamos con don OVIDIO SANTOS, un dos nosos mellores seguidores e "fósforo" a quen lle agradecemos a súa atención e enviámoslle os nosos mellores desexos dende esta pequena fiestra comunicativa. 

Comunicación-intervención co noso Poeta da Mariña Lucense: PACO RIVAS, que ademais de felicitarnos aproveita para recitarlle unha fermosa composición poética dedicada á nosa compañeira LAURA. Agradecémoslle a súa atención e desexámoslle o mellor para o vindeiro ano. 

E finalizamos esta nosa emisión deste ano falando co noso amigo SUSO DÍAZ, de Ludeiros -na Baixa Limia-, e enviámoslle os nosos mellores desexos radiofónicos e feiticeiros para este NADAL e aninovo.

Agardámol@s a tod@s o vindeiro día 10 de XANEIRO 

á mesma hora: de 18 a 20 horas... ...

¡¡¡  QUE TEÑAN UNHAS FEITICEIRAS FESTAS !!!

Programa do 13 de DECEMBRO do 2014

Con un puoco de retraso, por mor de certas "obrigas" persoais, que mo impediron, aquí vos deixamos o programa do sábado pasado, que consideramos sexa do voso agrado. Comezamos dándolles a ben-vida dende os estudios o equipo formado por MARC Fort -nos controis técnicos- XOSÉ LAMELA, LAURA SANTOS e un servidor. O noso amigo ARMANDO atópase facendo de presentador no XVIII Festival de Agarimos de Badalona. E a primera conexión-comunicación é con TONI SIMOES, da "TAVERNA del CLINIC", para felicitalo por ter acadado o Primeiro Premio como o "Mellor Cociñeiro xoven de Catalunya", concedido pola Academia CATALANA DE GASTRONOMÍA. Mantemos unha conversa moi agradable e chea de informacións e coñecementos sobre a súa tarefa como "Chef" da cociña dese Restaurante emblemático LA TAVERNA DEL CLÍNIC. Agradecémoslle a súa amable atención e prometemos saudalo e felicitalo personalmente, nunha vindeira visita ao seu establecimiento.

Facemos unha pequena mención aos Premios que foron concedidos no "XXVIII Certame de Poesía Rosalía de Castro", e tamén nos comprometemos facer os posibles para conectar cos agasallados para comentar estes Premios así como que nos lean algún dos seus poemas ou creacións.

A segunda comunicación é con XULIO SIMÓN, que como é habitual cada semana nos ten preparada a súa colaboración literaria ou cultural sempre moi interesante.

E antes de finalizar o programa chamamos a PACO RIVAS, que nos fala do seu proxecto creativo e poético, do que recibimos un adianto telefónico moi interesante.

A vindeira semana mais, e se nos é posible con moitas e interesantes novidades.

SÁBADO 29 de Novembro do 2014

O programa de hoxe estivo cheo de sorpresas moi agradables e os estudios cheos de persoas e amigos. Comezamos dándolles a ben-vida o equipo de sempre: Laura Santos, Armando Fernández e u servidor. Visítannos ELI RÍOS e ANA VÁZQUEZ, membros do Xurado do "28 Certame de Poesía Rosalía de Castro". Conversamos moi distendidamente... Escoitamos unha peza de música do CD recén publicado de Gaudi Galego, recibimos a Xosé Lamela...Un pequeno erro de comunicación e continuamos. 

  Falamos con ELI do seu libro: ANAMNESE e facemos un percorrido pola súa traxectoria. Aproveitamos para chamar a MANUEL LÓPEZ RODRÍGUES, que se atopa en NOIA, preparando o "II Encontro de POETAS" e recibimos información completa do evento e propoñemos escoitar unha peza musical con motivo do recoñecemento como Patrimonio Inmaterial, por parte da UNESCO, ao cante Alentejano. 

 Tamén recibimos nos estudios a MARÍA SIMÓN, unha "fan" incondicional de SES, e aproveita para contestar as preguntas que tiñamos no concurso das entradas dobres para o Concerto de "O Val das Mouras" e SES, na Sala2 Salamandra de Hospitalet. 

 Despedímonos cos desexos de que poidan sintonizarnos no próximo programa, despois dos festivos da Purísima. 

 Na segunda hora conectan con XOSÉ RAMÓN, da "Plataforma en Defensa do Castelo de Monterrei". Conversa-Entrevista informativa do que está a suceder no Val de Monterrei, das firmas solidarias que están acadando e da reivindicación social e popular para que non se convirta o Castelo en Hotel ou Parador... 

 A conexión final é con PACO RIVAS, o noso poeta da Mariña Lucense, que nos agasalla coa súa conversa e declamación poética.

 A vindeira semana non teremos programa, pero agardámosvos o día 13 de decembro.

22 de Novembro do 2014

Hoxe tivemos que disculpar á nosa colaboradora LAURA SANTOS, por mor dunha indisposición sanitaria (tiña gripe e ademáis estaba algo afónica). Levamos adiante a emisión este equipo: Marc Fort -nos controis técnicos-, Armando Fernández, Xosé Lamela e un servidor. Unha visita moi gratificante, a do noso correspondente na Baixa Limia, que nos acompaña nos estudios. Precisamente el mesmo nos presenta ao seu convidado desta semana que xa nos ten preparado para a intervención da primera hora de emisión: MONCHO CONDE CORBAL, un gran profesional do periodismo a quen lle agradecemos a súa amable participación e xa o consideramos un máis dentro da nosa lista de personaxes eminentes aos que acudiremos en vindeiras ocasións para que nos sigan a ensinar e ilustrar.

Na segunda hora chamamos ao noso correspondente nas RÍAS BAIXAS, Xulio Simón, que como cada semana sempre nos ten preparado un feixe de importantes comunicacións literarias e culturais inter-relacionadas con Galicia, Cataluña e Portugal. 

A seguinte intervención é a do noso Poeta da Mariña Lucense PACO RIVAS, con quen mantemos unha conversa distendida, dándolle un "repaso" a algunhas noticias de actualidade. Despedímonos escoitando unha declamación da súa autoría e primicia para tódolos nosos oíntes e seguidores.

A vindeira semana desexamos que voltedes a sintonizarnos. ¡Agardámosvos!

15 de NOVEMBRO do 2014

Na emisión de hoxe non puiden estar presente nos estudios, pero LAURA SANTOS e mais ARMANDO FERNÁNDEZ, levaron adiante este cometido coas seguintes intervencións:

En primeiro lugar tiveron a presencia nos estudios do cantautor ALFREDO GONZÁLEZ VILELA, que viña a ofrecer o convite a tódolos oíntes da presentación e oferta do seu ultimo traballo: VERITAS MI. Presentarase no Castell de Cornellà o vindeiro venres 21 de novembro.

Despois póñense en contacto con don OSCAR RODRÍGUEZ, Presidente do COXGA (Colexio Oficial de Xoiaría de Galicia), co que manteñen unha conversa moi ilustrativa e amena.

Intervén LAURA dando información e falando da estrea da película A ESMORGA, baseada na novela  do esgrevio autor galego Eduardo Blanco Amor, e que se presenta en Ourense con motivo do Festival de Cine.

Na segunda hora conectan novamente con Galicia para falar co noso correspondente nas Rías Baixas, Xulio Simón, e aproveitan a ocasión para chamarme a min. Mantemos unha pequena conversa sobre o tema que estaba a relatar o noso amigo.

Despois falan con IVAN SANJURJO, representante da nosa amiga SES, que virá a facer un Concerto na Sala Salamandra de Hospitalet de Llobregat o vindeiro día 29 de novembro.

A ultima intervención-comunicación é con don JUAN PRIETO, Presidente da Asociación Cultural Galega AGARIMOS, de Badalona, que fai un repaso e valoración das ultimas actividades realizadas. Aproveita a ocasión para convidar a tódolos seguidores e oíntes ao MAGOSTO (con castañas asadas e bolos preñados, acompañados de viño galego) que están a realizar precisamente no día de hoxe, na Entidade, rúa París, 45 de Badalona.

Despídense cos desexos de sempre: 

Que volvan a sintonizarnos a vindeira semana.

SÁBADO 08 de NOVEMBRO do 2014

Comezamos o programa propoñéndolles escoitar a ultima publicación do grupo FIANDOLA, que veñen de presentar o seu disco "VOLTA E MEDIA", para conectarnos despois co noso correspondente na Baixa Limia, Xosé LAMELA, que nos presenta ao seu contertulio de hoxe FRANCISCO XOSÉ FUMEGA PIÑEIRO, e cos que mantemos una conversa moi entretida e chea de coñecementos. Agradecémoslles a súa colaboración e despedímolos desexando voltar a falarnos.

A segunda comunicación é con ARMANDO FERNÁNDEZ, o noso colaborador que nos fai de correspondente dende o Centro Comercial MONTIGALÁ, de Badalona, no que se atopa para asistir ao "Iº Festival Solidario" organizado pola Asociación Cultural AGARIMOS, desa localidade.

Conectamos agora con XULIO SIMÓN, que sempre ten preparadas unha serie de informacións moi ben escollidas para comentalas con tódolos nosos oíntes e seguidores: Varias Pontevedras espalladas polo mundo; Eli Ríos, recente gañadora do Premio de Poesía Lueiro Rey, e outros comentarios interesantes...

A seguinte intervención é con DAVID, de "O VAL DAS MOURAS", que nos fala da intervención e participación no CONCERTO DE SES, na Sala Salamandra de Hospitalet de Llobregat o 29 deste mes de novembro. Dámoslle unha sorpresa e comunicámonos tamén con IVAN SANJURJO, representante da nosa amiga cantautora SES. O agasallo que nos fan é a posibilidade que ofrecen a  tódolos nosos oíntes e seguidores de obter algunha das 4 entradas dobres que sortearemos entre todos aqueles que nos chamen ou nos manden os seus correos, aos programas "Galegos no BAIX" ou "Sempre en Galicia", contestando ás dúas preguntas propostas por Iván:

1ª.- ¿Cal era o Grupo no que comezóu a subirse aos escenarios a nosa artista SES?

2ª.- ¿En qué barrio de A Coruña se desenvolve o decorrer da nosa cantautora SES?

Na ultima semana deste mes sortearemos estas entradas entre todos aqueles que participen.

Non puidemos contar coa presencia dos nosos asiduos colaboradores LAURA SANTOS e ARMANDO FERNÁNDEZ, por mor de certas obrigas persoais, pero coidamos que a oferta de hoxe foi digna e seguro que espertou o interese dos nosos oíntes e seguidores. A vindeira semana máis.