21 de novembro do 2009

Comezamos dándolle a benvida aos compoñentes do Xurado do XXIII Premio de Poesía "Rosalía de Castro" e o VI Certame de Narrativa Rosa Reboredo, baixo o patrocinio da Asociación Cultural Galega "Rosalía de Castro de Cornellà". Preséntanolos Xosé Carlos :
Presidenta: Dona Ana Vázquez,
Vicepresidente: don Carlos Fontes,
Vocal 1ª: dona Pura Salceda,
Vocal 2º: don Xulio Simón e o mesmo
Secretario: Xosé Carlos García G., e encetamos unha charla-coloquio falando de deste evento.
Fálannos dos seus proxectos. Ana do "portal do século de ouro" en colaboración co Cervantes. Pura fálanos dunha cousa moi importante a nivel de poesía, unha Antoloxía sobre poesía erótica, na que participan poetas cataláns, casteláns e galegos.
Depois continúa Carlos Fontes, que está a traballar con Galaxia para editar un libro que vai chamar "Versos en flor", está a traballar co Ateneo de Pontevedra... ... ... Continuamos con Xulio Simón que nos fala doutra publicación que está próxima a realizar, moi interesante, sobre Uxío Novoneira.
Na segunda hora tivemos en antena a don Andrés Castro, o Subdirector Xeral de Emigración que nos falou uns minutiños aos oíntes, aproveitando que viña a acompañar aos socios e simpatizantes da Asociación Rosalía na súa festa das Letras.
Rematamos estas dúas horiñas de radio comentando varios asuntos con Antonio Díaz, o Director da revista Lúa Nova.
Desexando que voltedes a conectar con noutros a vindeira semana, enviámosvos un saúdo cordial a tódolos que nos escoitades, polas ondas e pola Internet.

Sábado 14 do mes dos Santos do 2009

Hoxe comezamos dándolles noticias do que tentamos facer nestas dúas horiñas de radio. Algunhas noticias que nos chegan á Redacción e tentaremos comunicármonos con Manoel Carrete, habitual colaborador do noso programa, quen nos servirá de correspondente para podermos comunicármonos con algún responsable da Xunta de Galicia, que se atopa en Barcelona, con motivo da "Convención Nacional do PP, no Pazo de Congresos". O Ilmo.Sr.Presidente da Xunta de Galicia, don Alberto Núñez Feijoo, achagarase ao Centro Galego de Barcelona, para manter unha entrevista-coloquio con tódolos Presidentes das diferentes Asociacións Galegas de Cataluña.

A nosa primeira comunicación é con don Manuel Ruíz Rivas, o portavoz do PP no Parlamento de Galicia. Agradecémoslle a súa atención e convocámolo para podermos manter algunha conversa con máis detenemento noutro momento de menos apuro. Falounos dos asuntos que lle poden interesar a tódolos galegos que nos atopamos fóra de Galicia. Díxonos que estan a traballar para mellorar as cousas en Galicia e animounos a seguirmos na nosa teima de facer Galicia nos lugares onde nos atopamos.


Continuamos coas noticias que chegan á nosa Redacción. Damos cumprida información dos actos que se están a celebrar na "Asociación Cultural Galega Rosalía de Castro" con motivo das "Xornadas Culturais"...

Conectamos con Galicia e recibimos a Paco Rivas, unha vez máis, para escoitalo recitando algunha das súas ultimas creacións poéticas.

Na segunda hora temos intención de comunicármonos con Antonio Díaz, para que nos fale do nº 61 da revista Lúa Nova, que acaba de saír ao prelo. Non é posible, porque atópase cubrindo a información da visita do Presidente da Xunta de Galicia ao Centro Galego de Barcelona.

Conectamos coa Asociación Cultural Galega "Agarimos" de Badalona, para que nos falen do seu "Magosto" enxebre, que ten características moi semellantes ás que se realizan en Galicia, concretamente en Ourense, onde algunhas das persoas encargadas de asa-las castañas disfrázanse tentando remedar ás castañeiras (aproveitan para tiznar ás mozas e mozos que se achegan ao lume) e despois repartiranas a tódolos asistentes, acompañadas de bon viño. Ao final repártense os "bolos preñados" de chourizo, feitos polas mulleres da Asociación. Convídannos a que asistamos tamén á súa "Feira do Polbo" que se ven celebrando cada terceira fin de semana de mes, e que coincide pois coa data de mañá, domingo día 15, diante da Asociación, na rúa París nº 45 de Badalona. ¡Felicitacións para todos eles!

¡ ¡ ¡ Ate a vindeira semana ! ! !

7 de novembro do 2009

Comezamos ás 7 do serán.
Estaban a retransmitir un partido de futbol do Cornellà co Llavaneras, que por certo saíu vencedor o equipo da nosa localidade. Que reciban as nosas felicitacións.
Despois dunha pequena introducción, con algunha que outra información local (os diversos "Magostos" que celebran algunhas das Asociacións Galegas na provincia) e un convite para que asistan á Asemblea Informativa que realiza a nosa "Asociación Cultural Rosalía de Castro", facemos a nosa primeira comunicación con Galicia e conectamos con XULIO SIMÓN.

Voltamos a lembrarlles que poden achegarse á Saudade, Sabadell ou a Mollet, que celebran unha conmemoración dedicada a Rosalía de Castro. Paga a pena achegarse.
Agora conectamos outra volta con Galicia, e neste caso a nosa conexión é con PACO RIVAS, o noso poeta da Mariña Lucense, que nos deleita coa súa conversa e acaba a súa intervención co recitado duns versiños "quetiño" xa que pertencen ao seu ultimo libro de poesías.
Tomámonos a licencia de reproducilos aquí, para quen non teña o vagar e a pacencia de escoitar da súa propia voz ao noso poeta estimado.

Os meus versos son cancións
que lle aprendín de pequeno,
ó xugo tirar do arado
ó xílgaro, á rula, ó merlo,
ó lene asubiar do carro,
ó mar, á fervenza, ó rego,
ó vento contra un carballo,
ó piñeiro, ó toxo, ó fenlo,
ás estreliñas, ó orballo,
ó albor que desperta o ceo,
ás sete cores dun arco,
e nada do meu maestro.

E este que segundo dixo el, define ao seu pobo:

Por entre NOIS e ORXAL
hai un carreiro,
dous regos,
moitos verdes en camás,
cun anaquiño de ceo
... e aínda máis ...

Programa do 24 de outubro do 2009

Hoxe comezamos cunha boa noticia: Faremos o programa acompañados de Serxio Seoane e Kique de Vidal, que viñeron aos estudios para estar canda todos nós. Agradecémosllo moi de veras.

Comezamos cun avance de todo aquelo que temos previsto e deseguida conectamos con Antonio Rodríguez, o Presidente de "O Noso LAR de Terrassa", quen nos pon ao corrente dos acontecementos que están a realizarse nesa vila, en torno á nosa colectividade galega.

Conectamos, a seguir con Juan, o Presidente da Asociación Cultural Galega AGARIMOS, de Badalona, quen tamén nos informa das actividades que xa realizaron a semana pasada, con moitísimo éxito de asistencia e participación, e agardan o mesmo para mañá mesmo. Teñen previsto realizar (como cada ano por estas datas, máis ou menos) o seu Concurso-Participación de Roscóns e Empanadas caseiras. Os concursantes recibirán premios nas tres categorías establecidas: Presentación, Preparación e Degustación. Tamén nos adianta a celebración doutras actividades que teñen previsto realizar denantes de rematar o ano, como son "O Magosto", con castañas de Riós (Ourense) posiblemente, acompañadas de "bolos preñados de chourizo", e outras actuacións importantes na vila de Badalona e coxuntamente con Rosalía de Castro en Cornellà.

Novamente voltamos a Terrassa, para falarmos con Isabel, a responsable da exposición-mostra de libros galegos na festa do 27 aniversario de "O Noso LAR". A súa opinión é moi alentadora e séntese moi satisfeita de poder participar cos galegos de aquí, amosando un pouco das moitas editoriais galegas que alí se poden contemplar. Como é a súa primeira ocasión non pode dicirse que sexa unha experiencia totalmente productiva, pero o que si ten moi claro é que séntese moi agradablemente polo trato recibido e pola posibilidade que lle ofrecen de poder dar a coñecer un pouco da nosa cultura galega en Catalunya.

Na segunda hora comezamos cunha charla-coloquio con Serxio e Kique. Infórmanos da festa que teñen preparado no Palau de Congresos da praza de España, os responsables de "Toxos e Xestas", como cada ano, e que este coincidindo coa celebración do seu 25 aniversario estan todos convidados gratuitamente á súa asistencia. Ao parecer estarán representantes da nosa cultura galega no eido da representación artística, tanto musical como humoristas, orquestras e grupos de danza e baile tradicional.

Conectamos con Galicia e falamos con Xulio Simón, que nos fai un percorrido pola vida e obra de Anisia Miranda, que faleceu o venres pasado. É unha mágoa para tódolos galegos que coñeciamos a súa obra e máis será para o seu esposo Xosé Neira Vilas, a quen lle enviamos o noso máis sentido pésame de condolencia.

Despois falamos con Xosé Lamela. Sempre unha ledicia poder recibir novas daquelas terras de Lobios e Riocaldo. Dase a agradable circunstancia que ultimamente veñen tendo sorte na realización de obras e actuacións en favor e beneficio da zona. Felicitámolo, pola parte que lle toca e desexamos que sigan coa mesma teima e conseguindo moitos logros máis.

Despedímos ata a segunda semana de novembro, xa que non poderemos atender á emisión do vindeiro sábado por estar previsto unha programación especial de difuntos e mes dos santos. Así que desexámoslle que pasen unhas semanas agradables a todos.

Emisión do 17 de outubro do 2009

Esta semana comezamos coa intervención do Presidente da Asociación "Rosalía de Castro" de Cornellà, don Ricardo Pérez Anta, que nos fai un percorrido por tódalas actividades que estan a preparar para este trimestre final do 2009:

En primeiro lugar a excursión que teñen previsto para o vindeiro fin de semana 24 de outubro ás "Fonts del Llobregat", en Castellar de Nugth.

O seguinte fin de semana, 31 de outubro, a tradicional Festa do "Magosto".

Un Acto importante no Patronato de Cultura da cidade, no que se poderán ver actuacións do grupo da Asociación e doutras Entidades colaboradoras convidadas.

Despois, o 7 de novembro a "Asemblea Xeral" da Entidade para dar a coñecer tanto as actividades desenvolvidas neste ano, así como as previstas para o vindeiro curso e a preparación da Asemblea Ordinaria para finais de febreiro-marzo do ano 2010, na que se realizarán eleccións para levar adiante os destiños desta Asociación.

Tamén nos adiantou que posiblemente teremos a celebración das "Xornadas Culturais" para mediados ou finais de novembro. Así como tamén a festa de final de ano.

A seguinte comunicación-conversa é con Angel Luís Utrera, mantedor do blog "aopedofarelo", dende A Golada, Pontevedra, quen nos pon en antecedentes sobre a concentración que se pretende levar a cabo en Santiago de Compostela, baixo o título: "Querémolo galego".

Na segunda hora conectamos con Xulio Simón, que nos fai un pequeno percorrido polas moitas e variadas cousas das que nos fai partícipe. Dende Galicia vense as cousas doutro xeito. Tamén nos fala da concentración que teñen previsto facer en Santiago. Prometeunos falar dela na vindeira semana, e rematou a súa intervención coa declamación dunha poesía de Curros Enríquez, adicada a seu fillo.

Tamén estivemos falando con Paco Rivas, o noso "correspondente" máis antigo nesta nosa radio en galego, tal e como nos lembra el mesmo na conversa mantida. Como non podía ser menos, aproveita a ocasión para dar a súa opinión sobre esas cousas que provocan a prevista concentración en Santiago. Despedímolo escoitando dúas das súas composición poéticas.

Antes de rematar temos un bocadiño de tempo para escoitar e falar con Kike de Vidal, colaborador moi estimado e que fainos saber o seu desencanto polas cousas que están a suceder en Galicia por causa do "ataque" frontal contra a nosa lingua. Solidarízase coa plataforma "Querémolo galego" e danos a súa opinión aproveitando a entrevista, que saíu publicada no xornal Galicia Hoxe, a Camilo Nogueira.

Desexámoslle a tódolos oíntes unha semana chea de engado e convidámolos a voltar a conectar connosco o vindeiro sábado, no que tentaremos facelos pasar dúas horiñas agradables, en galego e escoitando música galega.

10 de outubro do 2009

Nesta fin de semana tivemos un programa algo máis extenso, con máis conexións teléfónicas e con moitas participacións dos nosos "escoitantes e internautas". Unha vez máis, temos que agradecervos a vosa participación e colaboración estimadísima. Precisamente sodes vosoutros os que facedes posible que esta nosa emisión saia adiante e se manteña nesa liña de alta audiencia que nos enche de orgullo e satisfacción. ¡Graciñas, unha vez máis!

A primeira entrevista-conversa foi con Xosé Luís Santiso, considerado por nosoutros como un colaborador imprescindible nas nosas emisións, e mantedor desa páxina tan fermosa que leva por título "chousadalacandra.blogspot.com". Coido que teremos que comprometelo para que nos faga de "reporteiro-comunicador" dende o Centro xeográfico de Galicia. Paga a pena escoitalo.

A seguir, despois de escoitar algunha peza das nosas músicas galegas, falamos con Henrique Fernández, "Kique de Vidal", que é o seu identificativo persoal na rede. Versou a súa intervención sobre a Cultura Galega en xeral e moi en particular rememorando a figura de don Vicente Risco, que debería ser recuperado para unha maior gloria e memoria da nosa historia.

Na segunda hora conectamos con Galicia e falounos Xulio Simón de variados temas. Mentounos a posibilidade de visitar Lugo, con motivo do domingos das mozas, de tantas lembranzas e ledos recordos para moitos dos nosos oíntes e para el mesmo. Lectura de textos interesantísimos e despediuse cunha referencia a Alberto Miguez, que faleceu o mes pasado en Madrid e lenos un texto de Méndez Ferrin sobre o Pensamento Político de Castelao, publicado en París... ...¡¡¡Escoitádeo aquí !!!

Despois falamos con Cesar, un dos compoñentes da Asociación de Veciños de Freixo e da Peña Freixo Rock, de Valladares, Vigo: http://freixo.net/penafreixo. Acaban de recibir nada menos que 30 participacións no "1º Concurso de CUTREMETRAXES de Freixo". Algo novidoso e do que seguiremos falando en vindeiros programas, xa que non só ten rabiosa actualidade, senón que tamén debemos ter información doutras cousas interesantes, ou cando menos fóra do común, e que serven para "enganchar" aos mozos-as en actividades diferentes e de certo interese, aproveitando as novas tecnoloxías. Noraboa pola súa inicitaiva e seguiremos en contacto, cando menos para saber cal foi o veredicto final e cales foron os gañadores dese "1º Concurso de Cutremetraxes de Freixo".

¡¡¡ Felicidades a tódalas PILAR e ata a vindeira fin de semana !!!

O Programa do día 3 de outubro do 2009

Tendo en conta que este sábado celebráronse unha morea de cousas interesantísimas para tódolos galegos que nos atopamos en Barcelona, non puidemos realizar un programa con tódalas novidades e actualizacións correspondentes, tan só tivemos tempo de acceder aos estudos e facerlles un adianto dos acontecementos:

Inauguración dos Xardíns de don Tiberio Ávila, en Nou Barris, a cargo do Sr.Alcalde de Barcelona, don Jordi Hereu, en presenza doutras autoridades locais, municpais e autonómicas, entre as que se atopaban:

.- a Rexidora do districte de Nou Barris dona Carmen Andrés,

.- unha delegación do Concello de Viana do Bolo composta por Bernardino, Manoel Carrete e un servidor de vostedes, de ahí a nosa ausencia no programa de hoxe,

.- o Presidente da Asociación Amigos de San Froilán, Sr. Fouce,

.- e o Ilmo.Sr.Presidente da Deputación de Lugo don José Ramón López Besteiro.

Pedímoslle desculpas aos nosos oíntes por ausentarnos da emisión para asisitir a este acto, pero non tiñamos outra opción. A verdade é que non podiamos relegar a nosa obriga de asistencia, xa que nos comprometéramos con moita antelación. Por outra banda o feito de que se incluíra no Nomenclator da cidade de Barcelona a figura de don Tiberio Ávila, hónranos a tódolos galegos que nos atopamos en Cataluña, non só pola distinción dunha persoa galega con moitísima proxección política e social no seu momento, senón tamén polo recoñecemento que con este acto se nos fai aos galegos que participamos e colaboramos no engrandecemento da cidade condal.

Aquí vos deixamos coas poucas verbas e música deses minutiños que fixemos acompañados do historiador Manoel Carrete, quen estivo connosco perante toda a emisión.