Programa do 14 de xuño

Comezamos o programa anunciando tódalas novidades que tiñamos previstas : *As colaboracións co Presidente da Asociación Rosalía de Castro: don Ricardo Pérez Anta, que nos deu unha pequena semblanza das actividades desenroladas ultimamente pola Entidade, díxonos do éxito acadado coa Festa de Can Mercader, falounos da próxima Festa de San Xoan diante da Entidade, anunciounos a actuación da compañía de Teatro Anduriña en Badalona e no CEntro Galego de BArcelona, así como a posibilidade de que actúen en Galicia, e desexounos unhas boas vacacións e lecer para todos neste verán.
*Conversamos con Kike, o noso Henrique Fernández, antigo colaborador e conductor deste programa e presidente da Entidade. Momentos entrañabeis e cheos de engado lembrando momentos de boa sintonía a carón de Xosefina, directora perante catro anos do "Sempre en Galicia". Quedamos para continuar esta conversa en vindeiras ocasións.
* Falamos con Xacobe, mantedor da páxina Aldea de CORO, nos Ancares de Galicia. Puidemos sentir a grande deicación e agarimo que lle profesa a esa terra o amigo Xacobe, deunos referencia de moitísimas cousas das que podemos disfrutar nesa riqueza que a natureza nos ofrece no Val de RAO. a súa páxina (http://www.aldeadecoro.com/) está á espera de que a visitedes e comprobedes as fermosuras que por alí se poden contemplar. Por certo que aínda existen castaños de más de mil anos naquelas contornas, e posiblemente podedes escoitar a "pita do monte" (urogalo) se vos achegades denantes que remate a primavera...

Teño prometido que farei o posible pra que calquera dos nosos oíntes e seguidores poidan voltar a escoitar as entrevistas ou intervencións das persoas que participan no noso programa. Por exemplo xa gravei os dous programas anteriores, agora tan só me fai falla convertir os documentos en Mp3 pra poder ofrecervos a posiblidade de voltar a escoitalos. Seguro que cando comecemos a seguinte tempada xa teremos esto máis adiantado e subsanado. Estou traballando nese eido e conseguirémolo.

Seguimos coas diferentes noticias que nos chegan habitualmente dende Galicia e conectamos, coma sempre, con XULIO SIMÓN. As súas informacións e comunicacións son sempre de actualidade e nesta ocasión fíxonos unha exposición extraordinaria sobre o emprego da nosa lingua. Díxonos que nolo enviaría para que, os que desexedes, poidades botar man del, cando o colguemos no blog.

A pesares da enorme competitividade que tiñamos, posto que televisaban o partido de futbol de España-Noruega? foi un programa entretido, e bastante interactivo, xa que tivemos varias chamadas telefónicas e ata compracemos a solicitude dun oínte que nos pediu a dedicatoria dunha peza de música para Ricardo.

Nesta ocasión non puidemos ofrecervos a sección "RECUNCHO POÉTICO", tanto dende Galicia na voz de Paco Rivas, como a nova incorporación IRIA, poeta galega en Catalunya. Quedamos emprazados para o vindeiro sábado 21 de xuño, que faremos o posible por aumentar o tempo didicado a esta sección.

A programación para o vindeiro día 21 publicarémola o vindeiro venres.

SETE de XUÑO : Desta si que foi posible!!!

Desta hecha puidemos dar conta dun programiña entretido. A nosa porposta puido levarse a cabo coa maioría do noso deseño.

* Comezamos conectando con CELSA, a profesora de matemáticas nun instituto de San Joan d'Espí, pero que leva 6 anos impartindo clases de galego aos alumnos do seu colexio e non só con moitísimo éxito senón que ademais fan intercambios anuais con diferentes colexios de Galicia que tamén imparten catalán aló. Forman parte do proxecto Galauda, os seus alumnos participaron no concurso anual da Universidad Autónoma de Barcelona "Contos do Mediterráneo" e unha aventaxada alumna, Ana concretamente, foi agasallada cun accésit neste certame. Escoitamos declamar a composición á nosa benquerida compañeira Celsa.

* No apartado de músicas tivemos intervencións diversas, ata unha dedicatoria para un dos rapaces - fillo ou neto socio de ACG.Rosalía de Castro - que facía a súa primeira comunión, o que nos obriga a pensar que alguén nos escoita, mal que lle pese a algúns.
Immediatamente conectamos con Santi Veloso, profesor da Universidade de Vigo e coordinador do programa "Ponte nas Ondas", quen nos informou do éxito acadado coa edición da súa XIV edición en Vigo, na Universidade, no Verbum e na praia de Samil. As actuacións musicais correron a cargo de "Voces da rádio (Portugal) e Luar na Lubre". No apartado referente á VII MOSTRA DE ORALIDADE Galego-Portuguesa , salientounos a participación da poeta e compositora SOCORRO LIRA e de AVELINO GONZÁLEZ. Este evento trascendental e de relevancia importantísima para o noso idioma viuse reforzado pola asistencia e apoio institucional que lle deu a presencia de dona María José Caride, Conselleira de Obras Públicas da Xunta de Galicia, e dona Teresa Táboas, Conselleira de Vivenda. As dúas consellerias mostraron o seu apoio á presentación da candidatura do Patrimonio Inmaterial Galego-Portugués á UNESCO. En resumo que MÁIS DE 70 CENTROS DE 7 PAÍSES DA XIV EDICIÓN, logran o apoio unánime dos máis novos na defensa do patrimonio inmaterial galego-portugués a Patrimonio da Humanidade.

*Na segunda hora a conexeión con Galicia levounos a falar con Xulio Simón, sempre atento á nosa chamada e solicitude para que nos informe das moitas cousas que alí están a acontecer. Fíxonos lembrar a un vello coñecido X.C.Fernández Alfaro, que faleceu días atrás e que ademáis doutros premios acadados como grande compositor, foi precisamente premio do Certame Rosalía de Castro de poesía en varias ocasións. Tamén nos fixo debecer e desexar estar canda el e no mesmo lugar posto que nos informou da súa estancia, con moi bo tempo por certo, nas terras de Barrantes, precisamente celebrando a Festa do Viño de Barrantes. ¡Felicitacións! Deunos cumprimda información de diversas noticias e destacou o feito de que xa se comezou a asulagar a mina de Meirama, que se convirtirá no segundo lago máis grande de Galicia.
Sempre é un placer escoitar as súas intervencións e máis cando aproveitar para relagarnos os seus comentarios con algunha que outra lectura de autores galegos de relevancia. Neste caso fixo referencias a Fernández del Riego, a Cunqueiro a Alonso Montero, a García Lorca.
Seguiremos con cada semana e seguiremos agardando que nos sorprenda coas súas aportacións.


* O RECUNCHO POÉTICO de Paco Rivas foi unha sucesión de tres poemas, coma sempre engaiolantes e cheos de creatividade e dozura para os nosos ouvidos.

Aumentámola sección coa incorporación dunha POETA GALEGA en CATALUNYA . IRIA, que podedes visitar en froresdagalvana, ou na súa páxina web. Clicade no goggle esa verba: froresdagalvana, e poderedes escoitala recitando unha das súas composicións.

Estivo acompañada coa guitarra dunha persoalidade importante no mundo do jaz. Grabamos a súa intervención e estou traballando para poder colgala neste blog. Non sexades impacientes que pronto conseguirei ese obxectivo: Facer posible o poder escoitar algunhas das entrevistas ou intervencións dos diversos colaboradores do noso programa.

31 de MAIO : Programa "accidentado"

Nesta ocasión tivemos que compartir as dúas horiñas de radio coa retransmisión, por parte de José Antonio Amores do partido da "Copa Catalunya" que disputaba o R.C.D.Cornellà diante do Castelledefells. Non tiñamos posibilidades de conectar con garantías e podermos compartir as conexións en directo e fixemos un programa un tanto "accidentado". A verdade é que a nosa técnica : IRENE MATAS, puxo da súa parte todo o posible para podermos ter as conexións precisas, pero... ... non puido ser. Ao remate gañou o Cornellà por dous tantos a un.
Tiñamos previsto falar con:
* Celsa e Charo, profesoras de galego en dous Institutos de Catalunya. Non puido ser.
* Con Suso Leiro, navegante solitario en Groenlandia. Tampouco puidemos ter a conexión.
* A colaborción semanal de Xulio Simón tivemos que suspendela.
* O Recuncho poético de Paco Ribas, que tiñamos previsto amplialo coa incorporación dunha poeta galega en Catalunya, tamén nos foi imposible de realizalo.

Demos cumprida información de tódolos acontecementos que se estaban a producir no noso entorno ( Homenaxe aos TAMARA e PUCHO BOEDO, no Auditori CAN ROIG i TORRES de Santa Coloma de Gramanet; o éxito acadado pola Asociación Rosalía de Castro en Can Mercader; a vindeira Festa: "GALICIA AVUI, GALICIA HOXE" en Sabadell a vindeira fin de semana días 6,7 e 8 de xuño... ... etcétera).
Fixémonos eco das noticias que nos chegaban de Galicia, salientando moi especialmente os PREMIOS NACIONAIS: o de Literatura a X.L.Méndez Ferrín, o de Pensamento e Cultura Científica a Díaz-Fierros, completando o elenco Mercedes Peón, Lourenzo e Laboratorio de Formas nos de Música, Artes Escénicas e Iniciativa Cultural.
Un pequeno comentario en relación ao cartel adxunto e unha pequena selección de música galega foi todo o que puidemos facer neste programa "algo accidentado" por mor das conexións.