Sábado 27 de Maio do 2017

Comezamos a emisión ofrecéndolles unha peza musical das "TANXUGUEIRAS", que estarán este serán na Festa Galega da "Irmandade Galega de RUBÍ". Tentaremos falar con eles durante a emisión de hoxe. A seguir conectamos con Galicia para falar co noso correspondente na Baixa Limia, don XOSÉ LAMELA, que nos presenta ao contertulio desta semana don XOSÉ BENITO REZA, que ven de presentar unha novela moi interesante: Terradentro. Conversamos deste tarballo e fainos unha detida descrición para que nos decidamos a mercalo. 

A segunda comunicación é con don MANUEL VÁZQUEZ, Presidente do "Centro Galego NÓS" de Sabadell, para que nos informe da "XXVIII Festa Galega" que se celebrará a vindeira fin de semana 2, 3 e catro de xuño, e convida a tódolos nosos oíntes e seguidores para que asistan e disfruten.

Na segunda hora conectamos co noso correspondente nas Rías Baixas, don XULIO SIMÓN, que nos relata as súas interesantes novidades e comentarios sempre moi ben escollidas.

Falamos despois con dona REBECA MUNIN, Directora da Revista PINCHA.gal, que nos atende moi amablemente e fainos un percorrido moi interesante de cómo e en qué consiste esta nova revista gratuita que veñen de publicar en Santiago de Compostela. Felicitámola por esta fermosa publicación e comprometémonos a voltar a entrevistala en vindeiras datas.

Recibimos nos estudos a don Ramiro ARCA, Presidente da Asociación de Amigos do Apostol, que ven a comunicarnos e informanos da exposición que se fará dende o 7 de Xuño en Barcelona. Agradecémoslle a súa aportación e colaboración. Precisamente hoxe mesmo estrenamos a grabación da nosa emisión e "colgamos" en youtube precisamente esta entrevista.

A vindeira semana desexamos ofrecervos outro programiña máis. Non faltedes.

SÁBADO 13 de MAIO do 2017

Un sábado máis tentando ofrecerlles dúas horiñas de radio en galego. Comezamos conectando con OLIVER Fernández, o Presidente da A.C.G.Rosalía de Castro, que nos informa dos diferentes Actos que están realizando ultimamente e convídanos a participar nos que se celebrarán nas vindeiras fins de semana, especialmente a Festa Galega de CAN Mercader, coincidindo coa Festa Major de Cornellà, que este ano será unha fita especial na que contaremos con LUAR NA LUBRE.

A segunda intervención é con RUBÉN Riós, que virá a Badalona a presentar a película que leva por título VIDA, ademais de participar na celebración do "20 Aniversario de Agarimos", na vindeira fin de semana do 20 e 21 de maio.

Despois conectamos con Galicia para falar co noso correspondente nas Rías Baixas, XULIO SIMÓN, que sempre ten preparada unha serie de novidades e comentarios moi interesantes.

E antes de finalizar o programa de hoxe conectamos novamente con Galicia para falar con FERNANDO Gallego, un xoieiro-artesán en Serra de Outes (A Coruña). 

Despedimos o programa ate a vindeira semana, que voltaremos con máis novidades e moita música. ¡Que sexan felices!

SÁBADO 06 de MAIO do 2017

Dámoslles a benvida a tódolos nosos oíntes e seguidores propoñéndolles escoitar unha peza musical do TRIO TALABARTE, que veñen de recibir un premio no "IV Certame de música Martin Codax".

A continuación conectamos con LINO PERDIZ, moi coñecedor da Baixa Limia, e partícipe de PLABALI, que nos ofrece a súa opinión e coméntanos os adiantos e posibles melloras que se pretenden acadar coas relacións e outras actuacións que están a facer relacionadas coa promoción daquela zona galega tan necesitada de melloras e acondicionamentos.

Conectamos con Galicia para que o noso correspondente nas Rías Baixas, Xulio Simón, nos faga un pequeno percorrido polas escollas que ten preparadas para todos nós.

Despois falamos con dona LAURA FERNÁNDEZ, Productora de Cine en Vía Láctea Films, que nos da cumprida información da estrea do filme de Ignacio Vilar, que ven de recibir unha man chea de premios en diversos festivais internacionais. O filme titúlase SICIXIA e poderase visionar na sala de cinema MALDÁ de Barcelona dende o día 12 (estreno con presencia do seu director) ate o día 18, en versión orixinal e con prezos moi asequibles. Agradecémoslle a súa amable atención.

E despedímonos ate a vindeira semana. Que disfruten e non deixen de sintonizarnos.

SÁBADO 29 de ABRIL do 2017

Comezamos o programa co equipo ao completo, dándolles a ben-vida e propoñéndolles escoitar un bocado de música para tentar de comunicármonos con Galicia e falar con MANUEL RIVERO, un dos grandes contertulios colaboradores que sempre nos ilustra coa súa intervención.

A segunda conversa-Entrevista é con don XOSÉ SIMOES, grande empresario e un referente no ámbito da gastronomía, moi concretamente no relativo ao cátering, pero que nesta ocasión é para poder falar con el sobre un proxecto, que xa está moi adiantado, relacionado coa publicación dun libro de recetas de cociña e de procedencia da zona arraiana da Baixa Limia. Unha recolleita moi especial, con moita documentación que ademais irá acompañada dun feixe de poesías súas, claro. Agradecémoslle a súa atención e desexámoslle moitos éxitos.

Na segunda hora comunicámonos con don JOSÉ CANOSA, Presidente da "A.C.G. Airiños da Nosa Galicia", en Santa Coloma de Gramanet. Aténdenos moi calurosamente e informa á nosa audiencia das actividades que teñen previsto realizar para commemorar o 34 Aniversario desa entidade, para os días 5,6 e 7 de maio vindeiro. Tamén nos fala do Teatro Ramboia.

E para finalizar conectamos novamente con Galicia para entrevistar a don RAFAEL QUINTÍA, un grande traballador da nosa cultura, que ven de publicar un CD con 29 pezas, que leva por título "A Pedra do Fundamento". Fálanos de diversas cousas relacionadas coa Antropoloxía, sobre os seus traballos e publicacións, das súas investigacións... A súa conversa é coma unha clase e ademais de agradecerlle a súa aportación ao noso programa, convidámolo a que poida participar "in situ", no verán, nun encontro a celebrar na zona arraiana da Baixa Limia. Despedímolo cunha peza de música dos Chichisos, Grupo Musical que axudou a fundar, e tamén nos despedimos de tódolos oíntes ate o vindeiro sábado.

Que pasen unha feliz semana.

Sábado 22 de ABRIL do 2017

Comezamos unha nova emisión ofrecéndolles unha peza musical do CD que leva por título "A Pedra do Fundamento", como adianto da posible entrevista que manteremos cun dos seus autores, don Rafael Quintía. Despois conectamos con dona MERCHI ALVAREZ, Presidenta de GALICIAME que nos pon ao corriente dos adiantos e novidades sobre un medicamento que acaban de autorizar e poñer en marcha para os afectados de Ame.

A sengunda entrevista é con don JUAN PRIETO, Presidente da A.C.G, AGARIMOS, de Badalona, que nos informa das actividades que teñen previsto realizar con motivo da celebración do 20 Aniversario desta Entidade, e no que destaca o Concerto de SES para o vindeiro día 19 de maio.

Na segunda hora, coma sempre, conectamos co noso correspondente nas Rías Baixas, XULIO Simón, que nesta ocasión preséntanos a XAN Rodiño, Campeón de BILLARDA de Galicia, con quenes mantemos unha animada conversa-entrevista chea de interesantes noticias e novidades.

Despedímonos dando cumprida información das ultimas e recentes novidades que nos achegan á Redacción e que están relacionadas coa Literatura e outras cousas da nosa cultura galega.

Non deixedes de sintonizarnos. Que pasedes unha feliz semana. Até o vindeiro sábado.

Sábado 08 de ABRIL do 2017

Finalizamos este primeiro cuatrimestre do ano coa retransmisión deste programa de comezos da Semana Santa dándolles a ben-vida e propoñéndolles escoitar unha peza musical para darlle paso á primeira Entrevista-Conversa co noso amigo, antropólogo galego, don MANUEL MANDIANES CASTRO, que nos ameniza coa súa disertación sobre varios aspectos interesantes da nosa idiosincrasia galega e parte da súa producción creativa e escrita. 

Despois falamos con MARTIN ALVAREZ GONZÁLEZ, un Profesor e Chef galego, responsable a Asociación Cultural As Ortigas da Baixa Limia, con sede en Celanova, que nos fai unha "clase" ilustrativa e maxistral sobre esa planta invasora da que moi pouco se sabe e que ten moitísmas aplicacións a nivel alimenticio e tamén na agricultura en xeral. ¡Moitas grazas!

Na segunda hora conectamos co noso correspondente XULIO SIMÓN, que sempre ten algunha cousa interesante que comunicarnos relacionada coa nosa cultura galega. Dessexámoslle que disfrute das Festas de Semana Santa. 

Finalmente a conexión é dupla: Con Paco Rivas, o noso poeta da Mariña e Xosé Lamela, cos que mantemos unha amena conversa relacionada con aspectos creativos de ambos e tamén recibimos, como agasallo final a declamación dunha das súas poesías. 

 ¡Que teñades unha felices Pascuas (adiantadas, porque serán o Domingo vindeiro) e que disfrutedes deste descanso e lecer da Semana Santa! Voltaremos dentro de quince días. Non faltedes á nosa emisión.

SÁBADO 1 de ABRIL do 2017

¡30 ANIVERSARIO da nosa emisión "Semprengalicia"! 

Hoxe celebramos este acontecemento na Sé da Asociación C.G.Rosalía de Castro. Agradecémoslle a asistencia a tódolos socios e simpatizantes que nos acompañan, ao Presidente Oliver Fernández,  así como tamén contamos coa presencia do 1º Director desta emisión, don Manuel Rodríguez Julián, outro ex.director don Emilio Luís López, a Directora da nosa Radio Cornellà, dona Mireia Navarro, os técnicos Kiko Belinchón e Victor, nos estudos Jose Antonio Castillo, e despois de darlle a ben-vida ofrecémoslle escoitar un bocadiño de música galega. A seguir comezamos as diversas intervencións dos convidados e asistentes e, como non, dámoslle a palabra ao máis veterano nestas lides, Manuel Rodríguez Julián, que despois pásalle a palabra a Emilio Luís López. Agradecémoslle a súa asistencia e amable participación, neste aniversario.

Voltamos a escoitar outra peza musical e de novo seguimos coas intervencións, primeiro dona Mireia Navarro e despois Oliver Fernández, Presidente da Entidade.

Seguimos con música e convidamos a que nos falen Antonio Díaz, socio fundador e Director da revista Lúa Nova. Tamén interveñen Ovidio Santos, Pepe, Sra.Pura e Antonio Meixide. É un pracer comprobar cómo se implican e participan nesta nosa teima de levar adiante este programa especial.

Na segunda hora sempre nos fala dende Combarro o noso correspondente Xulio Simón, pero nesta ocasión non é posible polo desprazamento da unidade móvil. Disculpámolo a el e a dona Xosefina González, exdirectora tamén deste programiña, así como Xosé Lamela, que por outros motivos non puido achegarse hoxe á Entidade. Dámoslle a palabra a Raúl, un veterano máis da Asociación e Antonio Díaz puntualiza algunha cuestión interesante.

Voltamos a escoitar outra peciña musical e nesta ocasión comeza a súa intervención Amparo Centeno, tamén socia de moita antigüidade, Emilio Luís aclara algunhas cousas, fálanos Rosario e Félix, que a pesar de non seren galegos participan, dende hai moito tempo, activamente na Entidade.

Máis música para irmos adubiando este serán de aniversario especial, e toman a palabra Abel, Suso, Pepe, Paulo e Hugo. Non podía faltar a intervención dos compoñentes do Grupo de Gaitas que para rematar tócannos a Muiñeira de Lugo.

Unha emisión chea de emoción e engado, que nunca esqueceremos. Os que formamos este equipo: Laura Santos, Armando Fernández e un servidor, queremos deixar patente o noso agradecemento máis grande á Oliver, como presidente da Entidade, que nos facilitou a celebración deste 30 Aniversario, á Directora dona Mireia Navarro polo desprazamento da unidade móvil ate a local, á Manuel e a Emilio Luís, pola súa implicación e participación desinteresada e, como non, a tódolos socios e simpatizantes que nos seguen e colaboraron e seguro que seguirán colaborando con nosoutros, ¡Moitas Grazas!

Non deixen de sintonizarnos. Que teñan unha feliz semana.