SÁBADO 26 de MARZO do 2022

Antía Muiño Sánchez

Comezamos coa nosa sintonía de sempre e despois das salutacións de costume ofrecémoslle unha peza de música para recibir a nosa primeira convidada: ANTÍA MUIÑO SÁNCHEZ. Saudámola e comentamos con ela parte da súa traxectoria como cantautora. Felicitámola porque foi convidada por Xabier Díaz para participar no seu próximo CD que levará por título "Levantarse e caer". Coméntanos que está a preparar a grabación dun seu CD con cancións da súa autoría e na que contará con colaboracións musicais moi importantes. Desexámoslle moitos éxitos e comprometémonos a falar con ela para sermos primicia en Cataluña cando teña xa preparado ese seu próximo traballo musical.

CHEF Xosé Carlos

Conectamos novamente con Galicia para falarmos con XOSÉ CARLOS GÓMEZ, CHEF do PAZO de TOUBES. Buque insignia da Adega "Viña Costeira". Un Pazo do século XVIII, no medio da natureza e rodeado de viñas, situado en Cenlle, cuna do Ribeiro. Un lugar excepcional para poder realizar calquera evento de ensoño, unha boda, unha reunión empresarial, unha despedida, unha Festa sorpresa... etcétera. Fálanos das ofertas gastronómicas que se poden disfrutar naquel fermoso entorno, da posibilidade de facer unha visita guiada, degustación e cata dos viños, así como da estancia e do Enoturismo que ofrecen. Agradecémoslle a súa amable atención e desexamos que teñan moitos éxitos.

A continuación dámoslle paso ao noso correspondente nas Rías Baixas, concretamente dende Combarro, Xulio Simón Rúa, que sempre ten a súa crónica semanal moi acaída e relacionada coa actualidade.

Tamén recibimos a crónica do noso correspondente na Costa da Morte, Oskar da Fontiña. Noticias e cominicacións escollidas e que se poden ampliar na páxina de quepasanacosta.gal, que sempre nos recomenda el mesmo. Mandámoslle o noso agradecemento pola súa colaboración.

Juan Pedro - Couxil - Marcos - Armando e Cristina

A ultima intervención é a do Presidente de ASOBECAT, Juan Pedro Sánchez, que nos presenta ao Ilmo.Sr.Alcalde de SANCEDO, don MARCOS ALVAREZ, que está acompañado da Concelleira de Cultura dona CRISTINA PÉREZ. Será o Concello Homenaxeado do "XVIII Festival do Botillo 2022" o vindeiro día 2 de ABRIL. Agradecémoslles a súa colaboración de hoxe.

E despedímonos ate o vindeiro sábado á mesma hora. 

¡Sexan felices!