SÁBADO 02 de OUTUBRO do 2021

Comezamos unha nova andaina, tempada 2021-2022, con ánimos de seguir aprendendo e ofrecerlles dúas horiñas de radio en galego. Despois das salutacións iniciais, propoñémoslles escoitar unha peciña de música para recibir ao noso primeiro convidado: OSCAR REY, que a partir de hoxe convertirase no correspondente que moi amablemente se presta para facernos de cronista oficial dende a Costa da Morte. Saudámolo e dámoslle a ben-vida ademais de agradecerlle a súa disposición e colaboración. A vindeira semana xa contaremos coa súa crónica para compartila con tódolos nosos oíntes e seguidores.

A segunda comunicación, conversa-entrevista é con XAN PAMPÍN,  líder do Grupo Musical AILÁ. Tamén o recibimos cunha peza do seu CD que virán a presentar aquí, a BCN, concretamente ao Tradicionarius de Gracia o vindeiro día 9 de outubro. Cóntanos cómo se formou este Grupo de música Tradicional de Raíz, cales son os seus compoñentes e infórmanos dalgúns dos Concertos que veñen realizando e outros que teñen en carteira. Agradecémoslle o tempo que nos concede e desexámoslles moitos éxitos.

Falamos coa nosa correspondente nos Ancares Lugueses, Fernanda Follana Neira. Infórmanos de diversas celebracións deportivas nas que participa e que son de grande importancia a nivel de Galicia. Tamén comentamos algunha cousa relacionada coa investigación e a arqueoloxía do entorno.

Facémonos eco e informamos da "Festa do San Froilán- 2021, en Nou Barris". Os días 1, 2 e 3 de outubro. Actuacións de Xuntanza (A.C.G.Rosalía de Castro, Casa Galega de Hospitalet e Agarimos de Badalona) e a Orquestra La Oca Band, para as sesións vermut e verbenas. Tamén poderán degustar os productos galegos de calidade que ofrece a Casa Díaz.

E conectamos novamente con Galicia para falar co noso colaborador, amigo e Poeta da Mariña Luguesa Paco Rivas. Sempre é un pracer poder conversar con el; sempre ten algunha frase ou poema axeitado co que nos agasalla na súa participación.

Despedímonos de tódolos nosos oíntes e seguidores ate o vindeiro sábado e colgamos o programa enteiro.