Tempada 2008-09 : Segundo Programa

Comezamos o programa conectando con "Xacobe"(Manuel para os amigos) que é o mantedor da páxina da "Aldea de CORO", que coñecimos ao traveso de Kike de Vidal. Unha conversa amena que nos serviu para saber algo máis do val de RAO, dos Ancares. Púxonos ao día das novidades que se suceden nesa belida zona galega. Realizaron a prometida viaxe polo Val con máis de 25 persoas achegándose aos altos máis destacados desa paraxe e finalizando en Coro cunha cea-xuntanza de confraternidade con productos da zona e cancións populares. Comentamos a posibilidade da estrea desa "Valse" composto por Kike adicado a eses vales tan feiticeiros, e tentar poñerlle letra aproveitando a colaboración e creatividade de "Rositas". Soubemos da participación, nesa páxina da Aldea de Coro, de moitas persoas con certo interese e destacadas no ambito social, e como non a colaboración da "Lagarta" que envía unha serie de "Contos dos Ancares", e á que convidamos para que nos faga partícipes, cando poida, deles.

Saudamos a "SERXIO SEOANE" que nos visita con novidades importantes. Púxonos ao tanto da súa tarefa de "Mánager" de varios artistas de grande éxito contrastado, como Anxo Lorenzo, Antonio Orozco, a modelo Tamara Ballesteros... ... prometeunos voltar a visitarnos coa compaña de Tamara e outros máis. Fixemos unha comunicación con Alfonso, un dos fundadores de "NEIRELA" e confirmounos a súa grande ilusión co grupo e as posibles actuacións no extranxeiro. Están a traballar no seguinte disco e moi ilusionados. Escoitamos a súa música e desexamos que sigan nesa liña de traballo. Comprometeuse a facer unha conexión mensual co noso programa "Sempre en Galicia" para darnos información das novidades musicais que se vaian sucedendo puntualmente e prometeunos traernos esa música novedosa e actual.

Tivemos unha conversas con RICARDO, o Presidente da Asociación Cultural Galega ROSALÍA DE CASTRO, que como ben sabedes segue a ser a mantedora deste noso programa. Fíxonos unha semblanza de tódalas cousas que se estan a preparar para as vindeiras datas na Asociación e como máis salientables e inmediatas a da Semana Cultural do Centro na que contaremos cunha edición máis do Premio de Poesía Rosalía de Castro e o de prosa Rosa Reboredo", a posibilidade de representar a obra de "A Pousadeira" en Lleida, baixo o patrocinio do Centro Galego de Lleida, o comezo das actividades, clases e diversos cursos na Entidade... ... unha morea de cousas ás que convidou a tódolos oíntes para que pasen polo Centro para que poidan elixir.

Falamos con Xosé Carlos, unha vez máis para que nos confirmara a súa asistencia á presentación das "Festas de San Froilán-2008", tanto en Catalunya como en Galicia, no Districte de Nou Barris de Barcelona, á que asistiu, como ven sendo habitual nos ultimos anos o Alcalde de Lugo Sr.Orozco.Estiveron presentes unha morea de representantes de diferentes Asociacións e do propio Concello.

A continuación puxémonos en contacto con Ramón REY,membro da Xunta Directiva dos "Amigos de San Froilán", que nos puxo ao tanto do que teñen preparado para a vindeira fin de semana, concretamente os días 3, 4 e 5 de outubro, en Nou Barris, co "Izado da Bandeira Galega no Districte de Nou Barris", con pasarúas das bandas de Gaitas de Saudade e Toxos e Xestas; Verbenas tódolos días a cargo de afamadas orquestras galegas (Os Satélites da Coruña e Nova Generación de Viveiro). Este ano actuará a Banda Municipal de Barcelona, o Grupo García Lorca, José Galisteo... ... Ramón Rey convidou a tódolos oíntes para que asistiran a tódolos actos, incluso á Misa solemne, con procesión, adicada a San Froilán. Tamén tivo ocasión para lembrarnos que asistiron ao desfile de San Patricio en Nova York, a primeira Asociación Galega de Catalunya que representa aos galegos nos Estados Unidos.

Finalizamos co noso RECUNCHO POÉTICO, dándolle a benvida a PACO RIVAS, para esta nova tempada e regalounos a todos varias composicións poéticas que nos axudaron a convidarvos a que volvades a conectar connosco a vindeira semana.

Estas foron as dúas creacións que nos declamou PACO:

Dame un bico cos teus ollos
pescantina de ollos guapos,
dame un bico cos teus ollos
e tirao ao mar dende o faro
que a brisa, remo das ondas,
ha-mo traer de contado.
Dame un bico cos teus ollos
que xa está a brisa remando.

Para a túa TRENZA
unha rosa branca collín da roseira
que naceu ao lado daquela fervenza
onde nos bicamos a tarde primeira.
Collín de contado para a túa beira.
Pasei polo prado, corrín pola veiga,
e cando coa rosa cheguéi á túa beira
no fondo do armario colgara-la trenza.

TEMPADA 2008-09 : Primeiro programa

Comezamos unha nova tempada con moitos azos e ganas de levar adiante unha tarefa engaiolante, para nós e para os que participan con nós. Non temos constancia de que tiveramos moita audiencia, non só pola retransmisión deportiva do mediático campión mundial de tenis Nadal, senón porque ademais encetamos algo máis adiantados que noutras tempadas. De tódolos xeitos moi ilusionados e con moitas ganas de cumprir os desexos de tódolos nosos oíntes.

BENVIDOS a tódolos que nos escoitades e a tódalas novas incorporacións.

Primeiro conectamos con Xosé Carlos, para que nos dera información das novidades e proxectos para esta nova andaina. Falounos do inmediato, AS XORNADAS CULTURAIS de Rosalía de Castro, no vindeiro mes de outubro, xa cáseque pechadas con tódolos eventos medio contratados, con agradables sorpresas para tódolos que se acheguen a compartir connosco ese tempo de mostra cultural galega en Cornellà. Tamén nos adiantou que pensa estar na Feira internacional de "TERMATALIA" en Ourense e dende alí fará de correspondente para que poidamos entrevistar a algunha personalidade relacionada con ese evento. Posiblemente se achegue a "O GROVE" e tamén nos fará chegar as novidades e importantes acontecementos que se desenrolarán con motivo da "Festa do Marisco".
Adiantounos que está trballando na elaboración dunha homenaxe aos "más de 22 anos de RADIO GALEGA en Cornellà", da conmemoración dos 50 números da revista "LÚA NOVA", dos seus desexos de estar máis tempo e máis perto da nosa emisión, dos moitos azos e ánimos que nos envia para tódolos que participamos neste proxecto.

Fixemos unha pequena lectura das noticias que semanalmente nos envían dende Galicia, e que facían referencia á
- Polémica suscitada tra-las declaracións de George Steiner ao amosar un nulo coñecemento da cultura galega.
- Festa do Marisco do 3 ao 12 de outubro, a pesares das improvisacións... ...
- I Xornada da Crítica Literaria Galega, organizada copa AELG.
- Inauguración da exposición "25 anos de cultura galega".
- A presentación do libro "Papés d'emprenta condenada... ... e que
- 25 paises, entre eles Xapón, daránse cita na feira Internacional TERMATALIA.

Conectamos con JUAN PRIETO, Presidente da Asociación Cultural Galega AGARIMOS, para que convidara aos nosos oíntes a participar na festa desa Entidade.

Tamén demos a coñecer algo de novidade en canto ás músicas que puidemos recoller en Galicia e que se acaban de publicar, como as de "Os nosos Gaiteiros" : José Rdgz.Santalla, José da Lagúa; ou Foliada nas Rías Baixas, Homenaxe a Ricardo Portela, O Mestre... ... que seguiremos ampliando na vindeira semana. Neste eido musical adicámoslle unha peza de música a Ricardo, de parte de Xulio.

Conectamos coa nosa POETA GALEGA en Catalunya IRIA FERNÁNDEZ, e fíxonos viaxar, coa poesía escollida por ela, polos ventos da vangarda, xunto con Manuel Antonio e outras poesías, moi seleccionadas, e pertencentes a cancións que non pasan de moda.

Deunos tempo de falar con MANOEL CARRETE, que nos adiantou a próxima realización dunha festa importante da Asociación de Bercianos en Catalunya, en Polinyà, e que os interesados deberían poñerse en contacto con MANOLO BARCIA, que é unha das persoas que axudan a coordinar este evento, no que destacounos a realización de xogos populares como a rá, a ferradura, os bolos bercianos, e outros. Tamén destacou que farase unha romaría moi importante, adicada a VIRXE de la ENCINA.

Prometimos falar con Paco Rivas e co Presidente Ricardo, pero non nos chegou o tempo. Tamén estaban na nosa axenda XAcobe, o mantedor da páxina da Aldea de Coro, e con alguén máis pero non tivemos máis tempo. Na vindeira semana tentaremos de cumprir tódolos obxectivos que nos propoñamos.

Agardámosvos