SÁBADO 3 de OUTUBRO do 2026

Comezamos unha nova andaina. A tempada 2026 - 2027, deste programa "Semprengalicia" coa mesma intención de sempre:  ofrecervos as noticias que nos achegan dende Galicia os nosos correspondentes e aquelas que recollemos nosoutros na Redacción, xunto coa música que intercalamos para ir adubiando este noso programa. Non contamos coa presencia do noso compañeiro ARMANDO FERNÁNDEZ, que aínda se atopa convaleciente. Desexamos que pronto se recupere. Encetamos o programa de hoxe coa Estrea Oficial da sintonía "XIAO", que xa demos a coñecer no programa de conmemoración do 40 aniversario deste programa, realizado na Sé da nosa Entidade "A.C.G.Rosalía de Castro". Así comezaremos tódolos sábados a partir dagora. Despois das salutacións oportunas e un bocadiño de música, conectamos co noso correspondente na Costa da Morte OSCAR REY, a quen felicitamos primeiramente polos éxitos que está a acadar na súa tarefa profisional, xunto con Fina Paulos. ¡Nhoraboa! e recibimos a súa crónica que resume moi sucintamente para darnos a coñecer algunhas novidades moi interesantes, e que se poden ampliar na páxina quepasanacosta.gal, como ben nos indica en cadansúa intervención. Tamén nos lembra que mañá, domingo volve a re-emitirse este noso programa en Radio RONCUDO a partir das 10 da mañá. Nosoutros engadimos que tamén se poderá escoitar en Radio FENE o vindeiro luns. Agradecémoslle a súa aportación e desexamos que teña unha feliz semana.

Escoitamos unha peza musical e poñémonos en contacto con XOSÉ LIZ de CEA, precisamente o autor desa peza. Este vigués é Profesor multi-instrumentista, compositor, mestre da corda pulsada, compositor, intérprete, arreglista e docente de grande prestixio nacional e internacional no circuito do Folk e da Celtic Music. Mantemos con el unha conversa distendida e axúdanos a coñecer, un bocadiño, a súa traxectoria creativa. Prometémonos voltar a conectar con el para que nos fale da próxima publicación na que está a traballar e que pronto estará no prelo. Despedímolo con outra das súas pezas agradecéndolle a súa amable atención e desexamos que colleite moitos éxitos.

A continuación falamos co noso amigo e colaborador HENRIQUE FEDEZ-MON SÁNCHEZ, que sempre está atento á nosa chamada. A conversa con el sempre é ben recibida. Coméntanos cousas da súa vivencia, de cómo pasou o verán, de aconteceres e sucesos nos que participou, así como dos que ten noticia e coñece, polo miúdo, como a fundación e celebración da "Festa do San Froilán" en Nou Barris, que puxo en marcha Domingo Díaz. Tamén fai unha referencia interesante sobre algún dos personaxes tradicionais que aínda se conservan no San Froilán de Lugo, fundados polo ilustre Trapero... Sempre é de agradecer a súa aportación.

 

Recibimos á nosa correspondente nos Ancares Lugueses, concretamente dende Becerreá, FERNANDA FOLLANA NEIRA, que ten preparada unha crónica relacionada con asuntos relacionados con aquela zona rural tan estimada. Coméntanos algunhas curiosidades do verán, o Mural da Ponte do Cruzul, a moi interesante e curiosa anécdota coñecendo a persoas de Sant Boi de Llobregat, facendo o camiño do Norte e moi concretamente o Camiño Lebaniego, en Cantabria. Agradecémoslle a súa colaboración e despedímola con música.

Mantemos unha conversa con ELIGIO SUEVOS, Presidente do Centro Galego de Lleida, que nos fala da Festa do Breogán, celebrada a fin de semana pasada. Infórmanos da celebración dun Curso de Cociña, que impartirá unha cociñeira de Galicia os días 15, 16 e 17 deste mes de outubro. A Festa do Marisco na afin de semana do 22 ao 25 deste mesmo mes. Xa no mes de novembro o Magosto con castañas e panellets regados con moscatel, viño do ribeiro e quizais con chupitos de licor café. Tamén comenta que xa se  enviaron os comunicados aos socios e colaboradores para que aporten as súas colaboracións á revista "Xurdimento". E unha importantísima comunicación: Están a traballar para celebrar o 50 aniversario do Centro Galego de LLeida, que será o vindeiro 2027. Pretenden facer unha Festa con moita participación e agardan que poidan achegarse a maior parte dos Centros Galegos de Cataluña. Agradecémoslle a súa comunicación e desexamos que sigan colleitando moitos éxitos.

Recibimos a ANTONIO, o Presidente da "Irmandade Galega O Noso LAR de Terrassa". Están celebrando o 44 aniversario da súa fundación, cunha "Festa do Pulpo en Tarrasa". Festa gastronómica os días 9, 10, 11 e 12 de outubro.Comezarán o día 9 cunha Reunión dos Centros Culturais de Terrassa e inauguración da Festa na Praza Ricard Camí. O Sábado día 10 apertura da carpa ao mediodía coa actuación do Grupo de Gaitas de Saudade e Xantar de Socios. O Domingo día 11 novamente actuación das Gaitas e Xantar Oficial coa asistencia de autoridades e outros Centros Culturais. E o luns, tamén festivo, continuará a celebración co Campionato de Tute. Desexamos que acaden moitos éxitos.

Cando comezamos o programa recibimos unha alerta climatolóxica moi importante, polo tanto despedimos o programa desexando que nos volvan a sintonizar o próximo sábado á mesma hora. ¡Que teñan unha feliz semana!

Deixamos aquí o programa completo.

SÁBADO 27 de XUÑO do 2026

 PROGRAMA ESPECIAL CELEBRANDO O 40 ANIVERSARIO DA EMISIÓN "SEMPRENGALICIA" 

EN RADIO CORNELLÀ

Estamos na Sé da Asociación C.G.Rosalía de Castro de Cornellà, na rúa Garraf. Comezamos o programa, coma sempre, coa nosa sintonía, as salutacións aos escoitantes e seguidores, pero tamén aos asistentes. Un bocadiño de música e recibimos a primeira felicitación nada menos que a do don  VALENTÍN GARCÍA, Secretario Xeral de Política Lingüística da Xunta de Galicia. Tamén escoitamos a de Rebeca Munín, Vicepresidenta de AMEGA (Asociación de Medios de Comunicación en Galego) e falamos co noso correspondente viaxeiro XOAN ARCO DA VELLA, que tamén aproveita para felicitarnos. Desexámoslle un feliz verán.

A continuación escoitamos unha peciña das nosas "Rosalieiras", cantareiras da Asociación C.G.Rosalía de Castro, tamén recibimos outra felicitación moi importante, a de XABIER DÍAZ, e a de ANA VILA PORTOMEÑE, a Poeta Labrega. Conectamos con MANUEL RODRÍGUEZ JULIÁN, que foi o primeiro director deste programa que hoxe celebra os 40 anos de existencia. Tamén o parabenizamos, pola parte que lle toca.

Seguimos con música e dámoslle paso á crónica do noso correspondente na Costa da Morte, OSCAR REY CALO, que sempre ten preparado un resumo das novidades que acontecen naquela contorna, ademais de lembrarnos que se poden ampliar esas novas na páxina quepasanacosta.gal e que mañá domingo voltará a escoitar este noso programa en Radio Roncudo a partir dasa dez da mañá. Agradecémoslle a súa colaboración e desexámoslle un feliz verán. Tamén se re-emitirá este programa o lun en Radio FENE, como cada semana.

Recibimos a Felicitación moi sentida de HENRIQUE FDEZ-MON SÁNCHEZ, ex-Presidente que foi da A.C.G.Rosalía de Castro e codirector deste programa nun tempo atrás. Fai lembranza dalgúns momentos importantes no desenvolvemento deste programa. Agradecémoslle a súa intervención.

Agradecemos a presencia de XOSEFINA GONZÁLEZ, que tamén formou parte da dirección deste programa durante un tempo, xunto con outras persoas. Coméntanos a súa experiencia enriquecedora e a participación que tivo de moitas persoas que estiveron ao seu carón. Tamén recibimos a felicitación da nosa correspondente nos Ancares Lugueses, FERNANDA FOLLANA NEIRA. Aproveitamos a interpretación dun cuarteto de gaiteiros da Asociación, para disfrutar da nosa música.

Entrevistamos a MARISA LÓPEZ TEIJÓN, doutora, xinecóloga, investigadora e divulgadora. Naceu en Vilafranca do Bierzo, moi colecida pola súa traxectoria relacionada coa reproducción asistida, e pola súa participación en proxectos de innovación e vivenda colaborativa. Durante un tempo foi directora do Instituto Marqués, centro especializado en tratamentos de fertilidade. Ten investigado sobre a aplicación da música en embrións e na audición fetal, pola que ten recibido o Premio Ig Nobel de Obstetricia. Felicitámola pola súa traxectoria investigado e ela aproveita para felicitarnos a nosoutros polo noso aniversario. Prometemos voltar a entrevistala.

Recibimos a chamada de ROCÍO GARCÍA PÉREZ, diputada no Parlamento de Catalunya. Felicítanos pola nosa traxectoria que ela mesmo coñece ben de preto, xa que estivo sempre moi ligada á nosa traxectoria radiofónica. Como periodista e responsable, tempo atrás, sendo Directora de Radio Cornellà, Agradecémoslle a súa amable atención e despedímola con música das nosas "Rosalierias".

Intervén o noso Presidente OLIVER FERNÁNDEZ, para agradecer a presencia dos asistentes e continuamos a conversa con XOSEFINA, ao tempo que recibimos a felicitación de CHRISTIAN SALLES, dende Brasil, a de CLARA FARIÑA, das Pandereteiras de Verducido e a de ANTONIO ÁLVAREZ, Presidente da Asociación Castaño e Nogal de Quintá de Cancelada.

Acompáñanos MIREIA NAVARRO, actual Directora de Radio Cornellà, a quen lle agradecemos a súa presencia e tamén que nos permitira poder emitir este programa para conmemorar este Aniversario cheo de participación e felicitacións que estamos a recibir. A súa felicitación é unha mostra máis do aprezo e cariño que se percibe polos responsables da Radio. Agradecémoslle as súas verbas e a participación de hoxe. Os nosos gaiteiros interveñen para animar a súa presencia.

Cantan as nosas Rosaileiras e despois recibimos as felicitacións do noso correspondente XULIO SIMÓN, dende Combarro. Tamén escoitamos a felicitación de CARMEN PENIM e PABLO, Administrador de Correos xubilado, que dende Vigo tamén nos envía a súa feiticeira felicitación. Falamos con Emilio Luís, que nun tempo atrás foi director deste programa que hoxe está de aniversario. Parabenizámolo, pola parte que lle toca e, agradecémoslle a súa aportación de hoxe no programa.

Falamos con SERXIO SEOANE, outra coordinador deste programa que nun tempo tamén estivo participando e axudando a súa difusión. Recibimos a felicitación doutra escritora e poeta amiga, dende Lalín: CHARO GOLMAR.

Os gaiteiros volven a interpretar outra peciña e recibimos as felicitacións de PILAR ANSEDE, Presidenta do Centro Galego de Barcelona e LUÍS LOSADA, Profesor xubilado e colaborador do noso programa coas súas "Palabras voadoras" e xa non temos máis tempo para recibir outras felicitacións que nos chegaron. Despedimos o programa ata o vindeiro mes de outubro que voltaremos con máis azos para seguir con esta tarefa comunicativa tan engaiolante.

Deixamos aquí o programa Completo - Enteiro, sin as felicitacións que colocamos a continuación, para que quede documentación.

Publicamos neste noso blog, o resto das Felicitacións que non puidemos escoitar na emisión de hoxe: XOSÉ MANUEL F.  MONTES, CESAR PAZOS, JUAN RODRÍGUEZ GÓMEZ DACAL (Do Centro Galego de Lleida) e MANOLO BARCIA. Moitísimas Grazas!

Outras poucas felicitacións, que non puidemos escoitar no programa: PEPE FORMOSO, VICTOR HUGO, CAROLINA SILVA, RAFA de RADIO MONFORTE e PEDRO PÉREZ (do Grupo Duplex). Moitísimas Grazas!

SÁBADO 27 de XUÑO DO 2026

Benqueridos escoitantes e seguidores. Esta tarde, a partir das 18h celebraremos na Sede a Asociación C.G.Rodalía de Castro en Cornellà (no Local da rúa Garraf) o "40 Aniversario deste nosa emisión SEMPRENGALICIA". Agardamos poder disfrutar cos socios e asistentes deste programa especial.

SÁBADO 20 de XUÑO do 2026

Comezamos coa nosa sintonía, as salutacións e un bocadiño de música. Tampouco hoxe non podemos contar coa presencia do noso compañeiro Armando Fernández, que se está recuperando dun pequeno malestar de saúde. Desexamos que pronto se recupere e enviámoslle moitos ánimos. A primeira comunicación e contacto é co noso correspondente na Costa da Morte, OSCAR REY, que nos ofrece a súa crónica, algo reducida, do que acontece por aqueles lugares. Agradecémoslle a súa aportación. Lémbranos que este programa re-emítese en Radio Roncudo mañá domingo a partir das dez da mañá. Os interesados poden ampliar as noticiasa que el nos comunica mediante a páxina quepasanacosta.gal. Nosoutros indicamos que tamén se pode escoitar este programa en Radio Fene, o luns, como cada semana. Desexámoslle que teña unha feliz semana.

A segunda comunicación é con PEPE FORMOSO, do Hotel Literario Bela Fisterra e do Albergue Bela Muxía. O motivo da conexión é para darlle os nosos parabens, por ter acadado un Premio polo "podcast" titulado. "Falar sen Cancelas". Aproveitamos a ocasión para preguntarlle por outros acontecementos que se celebrarán próximamente en Fisterra, e dos que nos facemos eco: O Fisterra Experiencie, para os días 26, 27 e 28 de xuño próximos. E outro acontecemento que se realizará no Hotel Bela Fisterra, relacionado coa degustación dos "100 Mellores viños de Galicia", previsto para o 18 de xullo próximo. Agradecemos a información detallada e desexamos que teñan moito éxito.

Conectamos novamente con Galicia para recibir a crónica do noso correspondente viaxeiro, reporteiro gráfico e contador de novidades moi interesantes, XOAN ARCO DA VELLA. Nesta ocasión achéganos para coñecer "Gaxate", no Concello de A Lama. Ten edificacións moi ostentosas, palacetes e casas de indianos que paga a pena visitar. Destaca un palacete totalmente restaurado e que está reconvertido en hotel: "Hotel-Boutique 1888". Coméntanos que tratará de falar co seu dono para que poidamos entrevistalo e que nos fale dese establecmento tan peculiar. Aproveitamos para enviarlle os nosos mellores desexos, por adiantado, para que celebre o día do SAN Xoan. Recórdanos que temos que facer o ritual das herbas na víspera do 24 pola noite, para escorrentar o meigallo e outras doenzas. ¡Moitas Grazas, Xoan!

Casa das Chocas

Falamos coa nosa correspondente nos Ancares Lugueses, concretamente dende Becerreá, FERNANDA FOLLANA NEIRA, que ten preparada unha crónica interesante. Primeiro coméntanos o evento que realizaou no "Parque do Alargo" en Navia de Suarna. Despois anúncianos a próxima inauguración da "Casa das Chocas", en Cervantes. Esta inauguración é unha proposta da Asociación gandeira "A Carqueixa". Tamén inaugurarán a taberna e unha piscina para lecer de tódolos clientes. Agradecémoslle a súa aportación.

Anunciamos a celebración da "Verbena de San Xoan", organizada pola nosa Asociación C.G.Rosalía de Castro, prevista para o día 23, diante da Entidade. Deberán anotarse no Restaurante da Asociación. Tamén comentamos a celebración que están a realizar no Centro Galego de Barcelona, a cargo de Alberte Montes e Silvio Falcón, co seu podcast de despedida de tempada "Bueno Carallo Bueno". Humor, entrevistas e outras historias entre eses dous protagonistas. Unha mestura curiosa de humor en galego. E despedimos o programa ata o vindeiro sábado que o emitiremos dende a Asociación C.G.Rosalía de Castro.

Ofrecémoslles unha pequena recensión de don Ramón Otero Pedrayo, con motivo da celebración do Ano Oteriano. Lectura de varios pasaxes da vida e obra de don Ramón Otero Pedrayo, mesturada con algunha peciña musical, para adubiar un chisco as informacións.

 

Deixamos quí o programa Completo - Enteiro.

SÁBADO 13 de XUÑO do 2026

Comezamos un sábado máis coa nosa sintonía e as salutacións precisas para darlles a ben.vinda a tódolos nosos escoitantes e simpatizantes. Disculpamos ao noso compañeiro Armando Fernández, que hoxe non se atopa con nosoutros por mor dunha pequena indisposición. Desexamos que pronto se recupere. Despois de escoitar un bocadiño de música, poñémonos en contacto co noso correspondente na Costa da Morte, OSCAR REY, que nos ofrece un resumo das principais noticias daquela contorna, e volve a lembrar que se poden ampliar esas novas entrando na páxina quepasanacosa.gal, e que mañá domingo, escoitarase novamente este programa a partir das dez da mañá, en Radio Roncudo. Dende Radio Fene tamén poderán escoitalo a partir do vindeiro luns. Agradecémoslle a súa colaboración.

Despois de escoitar outro bocadiño de música poñémonos en contacto con NOEMÍ, da "Arca da Noe", en Vilar de Barrio. Infórmanos dalgunhas das actividades e concertos que teñen previsto ofrecer nese espazo emblemático de mostra galega de cultura. A "Arca da NOE" é uma taberna chea de convívio, tal como se pode contemplar na súa páxina. A súa definición concretamente é: Un espaço de encontro, conversas e surpresas. Uma sala de concertos misturada con wokshops e vivéncias que só vas encontrar cá. Um lugar para se perder na paisagem e degustar gastronomía galega de calidade. Felicitámola polo seu 12 Aniversario, que celebrarán o próximo día un de agosto e desexámoslle moitos éxitos. 

Recibimos a MANUEL VÁZQUEZ, Presidente do Centro Galego NÓS, de Sabadell, que nos informa da celebración da Festa Galega que están a disfrutar no Eix Macià de Sabadell dende onte día 12 ata o domingo día 14. Teñen a posibilidade de disfrutar da festa con música da Orquestra KLAN, e dos gaiteiros do Centro Galego, pero tamén poden degustar os produtos galegos que alí mesmo se serven. Desexamos que teñan moito éxito.

Escoitamos a colaboración do noso correspondente XULIO SIMÓN, que corresponde ao día 6 de xuño, que tivemos festa e non se puido emitir. Así pois ofrecémoslles a súa escoita que finaliza cunha peza musical escollida por Xulio.

A continuación damos lectura dunha publicación feita polo noso correspondente viaxeiro e documentalista XOAN ARCO DA VELLA, que fai referencia ás Ruinas da Salazón de Alada, O Hío, Cangas e a Ría de Aldán. Un percorrido moi interesante, con lugares fermosos para fotografar e visitar, como é o propio Cruceiro de Hío, localizado diante do adro da Igrexa románica de Santo André de Hío. Esta obra é do canteiro de Augasantas (Cerdedo-Cotobade) Xosé Cerviño. Un conxunto artístico-relixioso de grande relevancia e moi visitado. Paga a pena achegarse.

Despedímonos do programa ata o vindeiro sábado á mesma hora.

Deixamos o audio da crónica do noso correspondente XULIO SIMÓN, dende Combarro, que sempre nos informa de noticias e novas daquela zona das Rías Baixas. Agradecémoslle a súa colaborción.

Aquí poden escoitar o programa Completo - Enteiro.

Publicación do PREGÓN e máis cousas da nosa Asociación C.G.Rosalía de Castro, de Cornellà

Queremos compartir cos nosos escoitantes e seguidores este pequeno documento que recolle un resumo da "Festa Galega de CAN MERCADER" diste ano 2026, celebrada os días 4, 5, 6 e 7 de XUÑO pasado. Nesta Grande Festa Major de Cornellà, a nosa Asociación tivo a honra de ser Pregoeira desta Festa. Este pequeno retallo documental recolle algúns dos momentos máis relevantes, que constitúen unha pequena semblanza do que representa esta nosa Asociación C.G. Rosalía de Castro,  na sociedade cornellanenca. 

SÁBADO 30 de MAIO do 2026

Comezamos unha nova emisión do "Semprengalicia" de cada sábado, coa nosa sintonía, as salutacións oportunas, disculpando a presencia do noso compañeiro Armando Fernández, que hoxe non pode acompañarnos, por mor dunha pequena molestia. Desexamos que rponto se recupere. Escoitamos un bocadiño de música e poñémonos en contacto co noso correspondente na Costa da Morte, OSCAR REY, que nos fai unha pequena descrición informativa do que acontece naquela contorna. Pódense ampliar estas noticias na páxina quepasanacosta.gal, e lémbranos que mañá, domingo a partir das dez da mañá, poderase escoitar novamente o noso programa en Radio Roncudo. Tamén se emitirá en Radio Fene, como indicamos cada sábado.

A segunda intervención é a de MANUEL VELASCO, escritor e conferenciante, que onte impartiu unha Conferencia con motivo da inauguración da "Festa das Letras no Camiño" organizada pola Irmandade Galega de Rubí. Falounos de Begoña Caamaño, que é a escritora homenaxeada este ano nas Letras Galegas do 2026. Deunos a coñecer a biografía desta periodista e escritora galega que faleceu moi nova, pero que tivo unha repercusión importante na sociedade galega do momento. Agradecémoslle a súa participación de hoxe no programa.

Falamos con ANTONIO DÍAZ, Director da Revista "Lua Nova", e tamén da revista, recentemente publicada, de Can Mercader, que recolle algúns artigos de importancia, xunto cos "Saúdas" de diversas personalidade políticas, como o Presidente da Generalitat, o Presidente do Parlamento Galego, a Presidenta da Deputación de Barcelona, o Presidente da Xunta de Galicia, o Secretario Xeral de Emigración da Xunta e o Presidente da A.C.G.Rosalía de Castro. Tamén recolle unha biografía de Begoña Diaz, a convocatoria do "XL Certame Internacional de Poesía "Rosalía de Castro", convocado pola nosa Entidade. Agradecémoslle a súa participación e desexámoslle que teña un feliz día de aniversario. Tamén se inclúe na Revista o cartel informativo sobre a Festa Galega de Can Mercader, durante os días 5, 6 e 7 de xuño próximo.

Recibimos a ANA, responsable de Prensa do Concello de Redondela, que nos fala da recén estreada "Festa da Coca" de Redondela. Un calendario de celebración durante nove días, dende hoxe mesmo, 30  de maio ata o día  7 de xuño próximo. Sacan a "Coca" ese dragón ancestral que pasea polas rúas con alfombras florais, sobrea as que pasará a procesión da Virxe, tamén se poderá ver a Danza das espadas e a Danza das Penlas, declarada de Interese Turístico Galego. Desexámoslle que teñan moito éxito. Agradecémoslle a súa ampla e completa información sobre esta Festa de Redondela.

Continuamos o programa e recibimos a CRISTINA OLIVA, recente gañadora do "IX Certame Literario de Relato Curto "Manoel Rivas" convocado polas Irmandade Galega de Rubí. Parabenizámola por ese relato que leva por título Longina". Coméntanos que ese relato é unha homenaxe a súa mai, que seu nome é precisamente o título do relato. Está basado nun feito real familiar, ainda que novelado, moi relacionado coa emigración. Fálanos da súa creatividade escrita, que ultimamente está centrada na poesía. Desexamos que teña moito éxito.

Recibimos a colaboración do noso correspondente viaxeiro e reporteiro gráfico XOAN ARCO DA VELLA, que hoxe nos fala da recollida das herbas para empregar o día de San Xoan. Comenta que xa ten recollidasa algunhas das sete que ao parecer son as que se deben empregar, aínda que nalguns lugares de Galicia ao parecer empregan algunha herba máis, ata nove, segundo nos comenta. Tamén nos fai unha reflexión sobre un achádego de grande relevancia relacionado coa restauración dun peto de ánimas dunha aldea. Desexamos que teña unha feliz semana.

Finalizamos o programa coa crónica do noso correspondente nas Rías Baixas, concretamente dende Combarro, XULIO SIMÓN RÚA, que sempre nos deleita cunha aportación cultural interesante, e finaliza coa proposta de escoitar unha peza musical escollida para esta ocasión.

Deixamos aquí o programa Completo - Enteiro.