Sábado 17 de marzo

No programa de Hoxe temos algunhas novidades e "primicias" para tódolos nosos oíntes e seguidores. Conectaremos con Galicia para falarmos co noso correspondente na Baixa Limia: Xosé lamela, que nos presentará ó seu convidado de luxo: don Francisco Rodríguez (Paco), Alcalde de Ourense. Despois recibiremos no estudio a dúas gaiteiras noviñas, Paula e Sara, de catorce e once anos respectivamente. Veñen acompañadas de Mª do Carmo Rigueiro, mai de Paula e da súa avoa. Tamén conectaremos con Galicia, unha vez máis, para falarmos de poesía con MªNeves Soutelo e con Manuel L.Rodrígues. E durante estas dúas horiñas pretendemos darlles a coñecer o ultimo traballo de "QUEMPALLOU", que nos acaba de chegar, recén publicado.

Así pois, coa compañía de ARMANDO FERNÁNDEZ, comezamos a emisión de hoxe ofrecéndolles a primeira peza dese ultimo disco de QUEMPALLOU: Vellas Novas, Foliada do Viño. A seguir conectamos con Galicia e falamos con Xosé Lamela e co Sr.Alcalde de Ourense, don Francisco Rodríguez. Escoitade as súas intervencións.

A seguir dámoslle a ben-vida a PAULA e SARA, dúas promesas gaiteiras cheas de xuventude e de moita arte. Interpretan unha primeira peza: Pasodoble de Mallou. Unha verdadeira ledicia escoitalas e velas cómo tocan. Falamos un chisco con elas e ademais de comentar algunhas cousas tamén nos din a quen queren imitar...

Novamente conectamos con Galicia, e nesta ocasión con Manuel L. Rodrígues, que nos presenta a unha poetisa, dona María Neves Soutelo, Licenciada en Historia pola Universidade de Santiago, que ven de publicar un libro de Poemas titulado:Diáspora. Mantemos unha conversa moi interesante e recibimos como agasallo a declamación de dúas das súas crecións poéticas. Agradecémoslle-lo e contamos poder voltar a falar con eles en vindeiras ocasións. Despedímolos con outra peza do grupo Quempallou, que mencionabamos ao comezo da nosa emisión: Vellas Novas.

Pedímoslle a Paula e a Sara que nos volvan a deleitar coa súa interpretación musical gaiteira e agasallánnos tocando "A Camposa". Unha nova sorpresa chea de engado e moi boa realización. Felicitámolas e desexámoslles que sigan traballando nese eido que seguro lles enche de satisfacción e que lles reportará moitísimos éxitos. Ogallá que voltemos a contar coa súa participación no noso programa en vindeiras ocasións. Graciñas, Paula e Sara. E tamén moitas gracias a MªCarmen por traernos este agasallo para tódolos nosos oíntes e seguidores, e que nós trasladamos a tódolos XOSÉS, como felicitación pola súa honomástica, que celebrarán o vindeiro luns.

E coa ultima peza de Quempallou despedímonos de todos desexando que volten a conectar coa nosa sintonía o vindeiro sábado, que tentaremos facer outra vez un programa entretido, cando menos igual e, se podemos, mellor. Ata a vindeira semana.

10 de MARZO do 2012

Sábado 10 de Marzo

O programa deste serán ofrecémosllo grabado no estudio 2 da nosa Radio. Hoxe faise un acto de importancia relevante na nosa "A.C.Galega Rosalía de Castro" : Día da Dona, e temos a obriga de asistir e participar nel. Para nosoutros é unha honra podermos colaborar neste acto adicado ás donas. Esté previsto que faga unha conferencia o señor Jordi, falando da poesía e nosoutros estamos convidados a declamar dúas composicións poéticas. Polo tanto o programa de hoxe emitirase despois da grabación que fixemos. Agardamos que sexa do seu agrado.

Nestes primeiros compases tentamos falarlles da vindeira inauguración ou máis ben da "reposición" do programa: "Galegos no Baix", que comezarase a emitir, no 89.4 da FM (Radio Sant Boi) a partir do vindeiro martes día 13 dende as Catro ata as Cinco. Tódolos martes de catro a cinco. A dirección correrá a cargo do noso colaborador Armando Fernández, e contará coa colaboración de Masito Beiró e Xosé Manuel Montes, dende Galicia. Desexámoslle grandes éxitos nesta nova tarefa.

A seguir comunicámonos con Xosé Lamela, que nos fala dos prolegómenos do Congreso do PESOEG que se está a celebrar en Santiago de Compostela, para elixir ao Secretario Xeral do partido.

Comunicámonos con Xosé Manuel Montes, que nos adianta a súa participación no programa de Armando en Radio Sant Boi: "Galegos no BAIX". Unha persoa desinteresada que sempre se amosou partícipe e colaborador en todo. Agradecémoslle a súa disponibilidade e seguro que será un correspondente extraordinario, dende Monforte de Lemos, para todos nosoutros.

Falamos agora con ALFONSO RICO, o novo Presidente da A.C.G.Rosalía de Castro, que nos pon ao corrente das actividades previstas realizar: A Conferencia de hoxe mesmo, un próximo Campeonato de Brisca, outra Conferencia prevista para as Letras Galegas no mes de maio, a Festa de Can Mercader, os días 8, 9 e 10 de xuño, a estrena dunha obra de teatro do grupo "Anduriña" o vindeiro día 16 de xuño... ...

Rematamos o programa coa audición dalgunhas pezas de música axeitada para despedírmonos despois de convidalos a participar nos Actos previstos para este serán na sede de Rosalía de Castro.

Agardámolos a vindeira semana, que voltaremos a facer o mesmo e se for posible moito máis e mellor.

sábado 3 de MARZO do 2012

Emisión do 3 de MARZO

 Comezamos o programa dándolle un adianto, aos nosos seguidores, do que tentamos facer nestas dúas horiñas de radio en galego. A primeira intervención-comunicación con Galicia é para falarmos con Xosé Lamela e coa súa convidada proposta, dona Mª do Carme Acuña do Campo, Diputada no Parlamento de Galicia. Falamos da súa pregunta no Parlamento relacionada coa supresión das "Urxencias de Farmacia" en Bande.

Novamente comunicámonos con Galicia, e nesta ocasión con Juan Carlos Barral, da Queixería Barral, en Arzúa, para falarmos da "37 Festa do Queixo de Arzúa-Ulloa".

Recibimos no estudio a Hermitas, Conchita e Manuela, socias da "Asociación Cultural Galega Rosalía de Castro" que nos veñen a falar dunha serie de actos que teñen preparados para conmemorar o "Día de la dona", na Entidade e na cidade de Cornellà. Convídannos a asistir o vindeiro sábado día 10 para que asistamos á Conferencia que se realizará no Centro e á posterior degustación de diversos productos gastronómicos confeccionados por elas mesmas (empanadas, tortillas, pinchos, filloas, bizcoitos, rosquillas, orellas de entroido...). Tamén aproveitamos para falarmos con Xaquin García Couso, ex-Alcalde de Arzúa, e socio fundador da Asociación C.G.Rosalía de Castro. Coméntanos varias cousas relacionadas coa Festa do Queixo de Arzúa-Ulloa.

Na segunda hora conectamos coas Rías Baixas, Combarro concretamente, onde se atopa o noso estimado colaborador Xulio Simón, que nos fai un percorrido escollido por algunhas interesantes novidades relacionadas coa nosa cultura.

Rematamos escoitando unha última peza do disco que nos envía "María do Ceo", editado por Zouma-Records, e desexando que volvan a conectar con nosoutros a vindeira semana.

Programa do 25 de FEBREIRO do 2012

Sábado 25 de febreiro do 2012

Comezamos este sábado coa intervención no noso programa de ANTONIO DÍAZ Vicepresidente da "Asociación Cultural Galega ROSALIA de CASTRO", e Director da revista Lúa Nova, posto que acaba de entregarse o nº 52 da revista que cumple nada menos que 25 anos de existencia. Infórmanos dunha serie de actos importantes para tódolos socios e simpatizantes da Entidade.

A segunda intervención provén de Galicia, como cada fin de semana, e poñémonos en contacto con Xosé Lamela, que nos presenta a don José Antonio Amoeiro, que foi Director do Parque Natural Baixa Limia-Serra do Xurés. Unha conversa interesante.

Na segunda hora contactamos coas Rías Baixas, onde se atopa o noso amigo e colaborador Xulio Simón, que nos fai unha crónica escollida dalgunhas das cousas interesantes da nosa cultura.

E antes de rematar conectamos coas Rías Altas, onde se atopa o noso "poeta da Mariña Lucense: Paco Rivas" que nos deleita coa declamación dalgunhas das súas creacións.

Rematamos cunha peza de música adicada a tódolos que nos seguen e aproveitamos para informarlles de que pronto poderemos escoitar un novo programa de radio en galego, dirixido polo noso colaborador Armando Fernández: "Galegos no BAIX", en Radio Sant Boi, no 89.4 da FM. Tódolos martes de 4 a 5 da tarde.

Volatermos a vindeira fin de semana. Agardámosvos!!!

 

Emisión do 18 de FEBREIRO 2012

Sábado 18 de febreiro.

Comeza este programa o noso colaborador ARMANDO FERNÁNDEZ, dándolle a ben-vida a unha das súas comunicantes de "A Fonsagrada", para que darlle información da Feira do Butelo que se celebrou esa fin de semana nesa localidade lucense.

A seguir conexión con Galicia para falar co ex-Sub.delegado do Goberno en Ourense, don Camilo Ocampo e con Xosé Lamela. 

Na segunda hora falamos con HELENA VILLAR JANEIRO, a Presidenta da Fundación Rosalía de Castro, que nos pon ao corrente das actuacións previstas para celebrar o "175 Aniversario" do nacemento de Rosalía de Castro. Tamén intervén Xulio Couxil.

Rematamos o programa informando dalgunhas cousas interesantes e escoitamos algo de música galega.

Voltaremos a vindeira semana coa mesma teima, se pode ser, mellor. 

11 de FEBREIRO 2012

Programa do sábado 11 de febreiro do 2012

Nesta fin de semana non poderemos contar con algunhas das nosas habituais colaboracións de cada emisión, pero contamos con poder ofrecerlles una programa entretido e ameno. A primeira parte dedicarémola a poñer no seu coñecemento algunhas noticias chegadas á nosa Redacción e centrarémonos nun pequeno apartado dedicado aos "Cantares de Cego".

Despois seguimos coas informacións diversas que nos chegan dende Galicia e que imos "adubiando" cun bocadiño de música escollida, para que poidamos manter unha mellor atención e procurar que sexa máis ameno o noso programa.

>

Na segunda hora comunicámonos con Galicia, con XOSÉ LAMELA  e mais con don XOSE LUIS RAPELA, arquitecto. Falamos do accidente de camión que se empotrou (xa vai un mes) no comedor dunha casa en Barbadás, e dos traballos previstos realizar para poñer solución a ese problema. Tamén aproveitamos para solicitarlle a súa impresión sobre temas relacionados coas Restauracións, así como dos plans previstos para esa zona e tamén da Baixa Limia. Agradecémoslle a súa colaboración, neste noso programa de hoxe e convidámolo a que volva a participar connosco en vindeiras ocasións.

Tamén conectamos coa "Mariña Lucense" e falamos co noso "poeta mariñán, don PACO RIVAS" e fainos a súa regalía particular declamándonos varias das súas composicións para axudarnos a rematar o programa de hoxe.

Desexámosvos unha feliz semana e contamos voltar a tervos na nosa sintonía, para ofrecerlles outra vez este noso programa, alomenos igoal, e se podemos mellor.

4 de febreiro do 2012

Programa do sábado 4 de FEBRERIRO

Encetamos o programa dándolle a ben-vida a Armando Ferdez. e adiantándolles o que propoñemos para estas dúas horiñas de radio: Falaremos con Xosé Lamela e con Agustín de PLABALI, conectaremos con NAVIA de SUARNA, para falar co seu Alcalde, falaremos con Xulio Simón, como cada semana, achegarémonos ao Concello de A Fonsagrada, para falarmos co seu Alcalde e tamén buscaremos un bocadiño de tempo para conectar coa nosa Asociación Cultural Galega "Rosalía de Castro"... E tentaremos escoitar algunhas pezas da nosa música galega, para facer un pouquiño máis entretido todo o condumio que temos preparado.

A primeira comunicación é, como lles anunciabamos, con Xosé Lamela que nos presenta a don Agustín, portavoz da Plataforma Baixa Limia.

A seguir conectamos novamente con Galicia e poñémonos en contacto con don José Ferdez.Ferdez., Sr. Alcalde de Navia de Suarna, que nos fala da "Festa da Androlla", e das moitas posibilidades turísticas das que dispón este Concello.

Detémonos un bocadiño para falarmos con Ricardo Pérez, membro da Xunta Directiva de A.C.G.Rosalía de Castro, que nos pon ao corrente das diferentes actividades que realiza a Asociación.

Proseguimos o programa e falamos agora con Xulio Simón, o noso correspondente que se atopa en Combarro, nas Rías Baixas, e fálanos de Isaac Díaz Pardo e outras interesantes cousas que sempre prepara con moito agarimo para todos nós.

E acabamos o programa de hoxe volvendo a conectar con Galicia, concretamente con don Argelio Fernández Queipo, Sr. Alcalde do Concello de A Fonsagrada, que nos fala da XV Festa do Butelo, que se celebrará a vindeira fin de semana do 11 e 12 deste mes de febreiro.

Voltamos a convidarvos a que conectedes connosco para facer a vindeira semana o mesmo o máis e mellor, se podemos.

Programa do día 28 de xaneiro

28 de xaneiro do 2012

Comezamos dándolle a ben-vida, como ven sendo habitual nestas ultimas semanas, ao noso colaborador ARMANDO FERNANDEZ. Xa forma parte do noso Equipo da Radio. A primeira peza de música é unha gravación que fixeron no Auditorio de Ourense a nosa amiga María do Ceo e Cristina Pato. De seguida comunicámonos con Galicia para falarmos con dúas persoas da zona de Fonsagrada e da Fontaneira: don Julio Fernández e o Sr.Bolaño. O primeiro é un recolector de Setas ecolóxicas con denominación de orixe, con boletín. E o Sr.Bolaño é propietario do Restaurante "O Cantábrico". Unha conversa agradable con ámbolos dous, que nos convidan a achegármonos a aquelas terras lucenses para probarmos eses manxares deliciosos que alí se procuran.

Despois falamos con EVARISTO FOXO, que nos informa da nova posta en marcha da súa tenda de productos de grande calidade galegos, na Estación de SANS, en Barcelona. Levaba un tempo pechada, por mor das obras do AVE, pero agora voltou a poñer en marcha esa tenda, cun espazo algo máis reducido, pero que con moitísima máis calidade. Como novidade incorpora a venda de PAN de Cea, recén forneado, así como as Empanadas. Paga a pena visitar esa mostra de Productos Galegos de Alta Calidade. Desexámoslle moitos éxitos e moita sorte.

A seguinte comunicación con Galicia é a nosa chamada para falar con Xosé Lamela, correspondente da Baixa Limia, que nos pon en contacto, unha vez máis, con Pablo López Vidal, Congresista. Falamos dese traballo que están levando adiante para poder acadar que na provincia de Ourense se poida dispoñer dunha area de solo industrial axeitada, coa finalidade de mellorar as posibilidades para instalación de empresas e creación de emprego na zona.

Na segunda hora falamos con Xulio Simón. Fainos unha homenaxe aos gaiterios, encarnada na persoa de don Xosé Manuel Seivane, do que xa demos conta do seu pasamento no día de onte, e que será soterrado en Ribeira de Piquín. A verdade é que Xulio sempre nos sorprende coa súa escolla e a morea de documentación que nos aporta para un mellor coñecemento do tema que nos fala.

 

Rematamos cunha pequena descrición-historia do Loro Ravachol, do que seguiremos a falar na vindeira semana... Agardámosvos a todos.

21 de XANEIRO do 2012

3º programa do 2012 - 21 de XANEIRO

Comezamos dándolle a benvida aos amigos do Bierzo ASOBECAT, que nos visitan para informarnos do seu "IX FESTIVAL DEL BOTILLO en Cataluña": Juan Pedro Sánchez e Jose Antonio López "Toño".Fannos unha pequena introducción do que vai ser este evento tan importante, que cada ano celebran no Hotel CAMPUS de Bellaterra. Nesta ocasión agasallan ao Concello de Balboa e conectamos precisamente co seu Alcalde, don José Manuel Gutiérrez Monteseirín para mantermos unha pequena conversa con el. 

A seguir saudamos a RAMIL, un participante do ultimo Operación Triunfo que nos ven a agasallar o seu primeiro CD que leva por título o seu propio nome RAMIL. Preséntanolo Serxio Seoane, que o acompaña. A verdade é que nos consideramos moi afortunados xa que somos a primeira radio en Cataluña que temos o privilexio de falar con el e sentímonos moi honrados coa súa visita. É un agasallo para os amigos do Bierzo e tamén para tódolos nosos seguidores.

Agradecémosllo moi sinceiramente, tanto a Serxio como a RAMIL: ¡Gracias, en nome de todos!

Conectamos con Galicia para falarmos, coma sempre, con XULIO SIMON, que nos pon en contacto concretamente con CARLOS CARBALLA, "Carramón" para os amigos, que nos fala da súa experiencia no Cruceiro COSTA CONCORDIA. E seguimos a escoitar outro dos singles do CD de RAMIL.

Continuamos a falar cos nosos "Amigos do Bierzo" que volven a convidarnos a todos para que participemos no grande evento que celebrarán o día 11 de febreiro no HOTEL CAMPUS de Bellaterra e acabamos o programa escoitando unha peza máis de música e desexando que volvan a conectar con nosoutros na vindeira semana, que prometemos ofrecerlles outra vez dúas horiñas de radio en galego.

Programa do 14 de XANEIRO

Nesta ocasión encargouse ARMANDO FERNÁNDEZ do programa de hoxe.

Nesta ocasión non podemos "partir" o programa porque a continuidade do mesmo fáisenos algo longa. Así que aquí temos o programa enteiriño. Armando faloulle aos nosos oíntes de varios temas: O Gaiteiro RICARDO PORTELA, A historia da Rianxeira, Isaac Díaz Pardo, algo sobre o Ballet Rey de Viana, e outras cousas interesantes. Podedes escoitalo aquí, acompañado dunha selección de música galega escollida para a ocasión. Agardamos que sexa do voso agrado.